ލ. ގަމުގައި ކަރަންޓުގައި ޖެހި ބޮޑެތި އަނިޔާތަކެއް ލިބުނު ކުއްޖާއަށް އައިޖީއެމްއެޗްގައި ވެންޓިލޭޓަރުގައި ފަރުވާދޭން ފަށައިފިއެވެ.
އުމުރުން 14 އަހަރުގެ އެ ފިރިހެން ކުއްޖާ، އިއްޔެ މާލެ ގެނެސް މިހާރު ފަރުވާދެނީ އައިޖީއެމްއެޗްގެ އައިސީޔޫގައި ވެންޓިލޭޓަރުގައި ކަމަށް އެ ހޮސްޕިޓަލުން މައުލޫމާތު ދީފައިވެއެވެ.
މާލެ ގެނައުމުގެ ކުރިން ކުއްޖާއަށް ފަރުވާދީފައި ވަނީ ލ. ގަމު ހޮސްޕިޓަލުގައި ވެންޓިލޭޓަރުގަ އެވެ.
އެ ކުއްޖާ މާލެ ގެނެސް އައިޖީއެމްއެޗްގެ އައިސީޔޫގައި ވެންޓިލޭޓަރުގައި ފަރުވާދެމުންދާއިރު، ކުއްޖާގެ ހާލު ސީރިއަސް ކަމަށް މައުލޫމާތު ލިބެއެވެ.
އިތުރަށް މައުލޫމާތު ލިބިފައިވާ ގޮތުގައި، ކަރަންޓުގައި ޖެހުމުގެ ސަބަބުން މާލެ ގެނައިރު ވެސް އެ ކުއްޖާ ހޭނާރައެވެ. އަދި ހަށިގަނޑުގެ ބޮޑު ބައެއް ވަނީ ފިހިފައިވާ ކަމަށްވެސް މައުލޫމާތު ލިބިފައިވެއެވެ.
އެ ކުއްޖާ ކަރަންޓުގައި ޖެހިފައިވަނީ، އެ ރަށުގައި އީދަށް ތައްޔާރުވުމުގެ މަސައްކަތް ކުރަމުންދަނިކޮށެވެ.
