ހުޅުމާލޭ ޖަލުގައި ހުކުމް ތަންފީޒު ކުރަމުންދިޔަ ގައިދީއެއްގެ ހާލު ދެރަވެގެން އައިޖީއެމްއެޗްގައި ފަރުވާ ދެމުން ދަނިކޮށް ނިޔާވެއްޖެއެވެ.
މޯލްޑިވްސް ކަރެކްޝަނަލް ސަރވިސްއިން މައުލޫމާތު ދެއްވާފައިވާ ގޮތުގައި ނިޔާވެފައިވަނީ ދަފްތަރު ނރ. 439، އިބްރާހިމް ސުޙެއިލް (53އ) އެވެ. ސުޙެއިލްއަކީ ހުޅުމާލޭ ޖަލުގައި ހުކުމް ތަންފީޒު ކުރަމުންދިޔަ މީހެކެވެ.
ކަރެކްޝަންސް އިން ވިދާޅުވީ ސުޙެއިލްގެ ސިއްހީ ހާލު ދެރަވުމާ ގުޅިގެން އައިޖީއެމްއެޗްގައި އެޑްމިޓްކޮށްގެން ފަރުވާ ދެމުންދާތާ މިހާރު ހަފްތާއެއް ވެފައިވާ ކަމަށެވެ. އޭނާ ނިޔާވެފައިވަނީ ހޮސްޕިޓަލުގައި ފަރުވާ ދެމުންދަނިކޮށް "ނިއުމޯނިއާ ޖެހިގެން" މިއަދު ހެނދުނު 9:05 ހާއިރު ކަމަށް އެ ސަރވިސްއިން ބުނެއެވެ.
މައުލޫމާތު ލިބިފައިވާ ގޮތުގައި ސުޙެއިލްއަކީ 2025 ވަނަ އަހަރު ސްޓްރޯކެއް ޖެހި، އެކަމަށް ފަރުވާ ހޯދަމުން އައި މީހެކެވެ. އޭނާގެ ސިއްހީ ހާލަތު އިތުރަށް ގޯސްވީ އެ ބަލީގެ ސަބަބުން ކަމަށް ބެލެވެއެވެ.
ސުޙެއިލް ނިޔާވުމާ ގުޅިގެން ކަރެކްޝަންސް އިން ވަނީ އެކަން ފުލުހުންނަށާއި، އޭނާގެ އާއިލާއަށް އަންގާފައެވެ. މީގެ އިތުރުން އިންސްޕެކްޓަރ އޮފް ކަރެކްޝަނަލް ސަރވިސްއަށާއި، ހިއުމަން ރައިޓްސް ކޮމިޝަން (އެޗްއާރުސީއެމް) އަދި ނެޝަނަލް އިންޓެގްރިޓީ ކޮމިޝަން (އެންއައިސީ) އަށް ވެސް މިކަން ވަނީ ރަސްމީކޮށް އަންގާފައެވެ.v
