ކެޕްޝަން ހަދާފައި ރީތި ވާހަކަ ދެއްކިއަސް ގައުމުގެ ލީޑަރުން މަސައްކަތް ކުރަނީ ހަމަ ދިމާ އިދިކޮޅަށްކަމަށް ޕީއެންއެފްގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފްގެ ޓައުން ހޯލު ޖަލްސާގައި ވާހަކަފުޅު ދައްކަވަމުން ރައިސް ޔާމީން ވިދާޅުވީ މި ސަރުކާރުން އަދި ސަރުކާރުގެ މުވައްސަސާތަކުން މިވަނީ ރައްޔިތުންގެ އަތުގައި ނުނެއްޓޭ ވަރުގެ ކަސްތޮޅެއް އަޅުވާފައި ކަމަށެވެ.

އެމަނިކުފާނު ވިދާޅުވީ މި ސަރުކާރުން ކަންތައް ކުރާގޮތް މިވަނީ މިހާރު ޖިނާއީ މައްސަލަ ބަލާ ހިސާބަށް ގޮސްފައި ކަމަށެވެ.

ހާލަތު ބަދަލުވެގެން ގޮސްފައި މިވަނީ މުޖުތަމައުގެ މައުސޫމުކަން ގެއްލިގެންދާ ގޮތަށް ކަމަށްވެސް ރައިސް ޔާމީން ވިދާޅުވިއެވެ.

ރައިސް ޔާމީން ވަނީ މި ސަރުކާރުން މުޖުތަމައުގެ ފެބްރިކް ވީދައިގެން ދާ ވަރަށް މި ކަންތައްތައް ރާވާފައިވާކަންވެސް ފާހަގަކުރައްވާފައިއެވެ.

އަދި މިފަދައިން ގާނޫނު އަސާސީއިން އުފައްދާފައިވާ ޗެކް އެންޑް ބެލެންސްކުރަން ހުރި މުއައްސަސާތައްވެސް މަސައްކަތް ކުރުމަށް މި ސަރުކާރު ފުރުސަތު ނުދޭކަން ފާހަގަކުރައްވާ މި ކަންތައް ކުއްވެރިކޮށްފައިއެވެ.

ރައިސް އިތުރަށް ވިދާޅުވީ މިކަންތައްތައް ރަނގަޅުކުރަން މަސައްކަތް ކުރަން އެބަ ޖެހޭ ކަމަށެވެ.