ވާނުވާ ބަންދާއި ރައީސް އަބްދުﷲ ޔާމީނާ ގުޅޭގޮތުން ހެދިހާ ދޮގުތަކުން ރައީސް ޑރ މުހައްމަދު މުއިއްޒު ޚަރާބުވެ ނިމެނީ ކަމަށް ކުރިގެ ނައިބު ރައީސް އަދި ޕީއެންއެފްގެ ވެސް ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.
ރައީސް މުއިއްޒު ރައީސް ޔާމީން މިނިވަން ކުރަން ވީ ވައުދާ އަދި ވާނުވާ ބަންދު އުވާލުމަށް ވީ ވައުދުވެސް ވެރިކަމަށް ދެ އަހަރު ވެގެން ދިޔައިރުވެސް ނުފުއްދާވާތީ ގިނަ ފާޑުކިޔުން އަމާޒުކުރަމުންދާ ދަނޑިވަޅެއްގައި ޑރ ޖަމީލު މިވަނީ އެކަމާ ގުޅޭ ގޮތުން އެކްސް ޕޯސްޓެއް ކުރައްވާފައެވެ.
އެމަނިކުފާނު ވިދާޅުވެފައިވަނީ، ނަބަވީ އިރުޝާދުން ސާބިތު ވަނީ ދޮގު ހަދާ މީހަކު ހުރިހާ ބާވަތެއްގެ ނުބައިކަންތަކުގެ ތެރެއަށް ވަންނާނެކަމެމަށް ކަމަށާ އަދި ނުބައިކަންތައް ނަރަކަޔަށް މީހާގެންދާނެކަމަށް ކަމަށް ވިދާޅުވެފައެވެ.
ޑރ މުއިއްޒު ޓެގު ކުރައްވާ ޑރ ޖަމީލު ވަނީ ވާނުވާ ބަންދާއި ރައީސް ޔާމީނާ ގުޅޭ ގޮތުން ހެދިހާ ދޮގުތަކުން މުޅި މިހާ ޚަރާބުވެ ނިމެނީ ކަމަށް ވިދާޅުވެ އަދި ވައްކަމާ ޚިޔާނާތްތެރިވުމާ ގައުމު ލޫޓްވުން ފަދަ ހުރިހާ ނުބައިކަމެއް ރައީސް މުއިއްޒު ކުރާނެކަމަށް ކުރެވޭ ތުހުމަތަށް ގިނަ ބަޔަކު މިއަދު ދެބަސްނުވާނެ ކަމަށްވެސް ވިދާޅުވެފައެވެ.
ޑރ. ޖަމީލު މިފަދައިން ވިދާޅުވެފައިވާއިރު، ރައީސް ޔާމީނަށް އެމްޑީޕީ ސަރުކާރުގައި ކުރީ ސިޔާސީ ދައުވާތަކެއް ކަމަށް ބުނެ ވެރިކަމަށް ވަޑައިގެން ރައީސް މުއިއްޒު ވެސް ގެންދަވަނީ އެ ދައުވާތައް ކުރިއަސް ގެންދަމުންކަން ފާހަގަކޮށްލެވެއެވެ. އަދި ވެރިކަމުގެ ފުރަތަމަ 100 ދުވަހުގެ ތެރޭގައި ވާނުވާ ބަންދު ނިމުމަކަށް ގެންނާނެ ކަމަށް ވިދާޅުވި ނަމަވެސް ދާދި ފަހުން ބޭއްވި ރައްޔިތުންގެ ބައްދަލުވުމެއްގައި އެމަނިކުފާނު ވަނީ އެއީ އުވާލެވޭނެ ބަންދެއް ނޫން ކަމަށާ އެއީ އެމަނިކުފާނަށް ކުރެވޭނެ ކަމެއް ނޫން ކަމަށް ވިދާޅުވެ ވައުދު ބޮލާލާ ޖަހާފައިކަން ވެސް ފާހަގަކޮށްލެވެއެވެ.
