މަސްވެރިންގެ ކަންބޮޑުވުންތައް ހައްލުކޮށްދިނުމުގައި ނުކުޅެދެންޏާ ބުއްދިވެރިވާނީ ވެރިކަމުން އިސްތިއުފާ ދިނިއްޔާކަމަށް ޕީއެންއެފްގެ ސެކެޓްރީ ޖެނެރަލް މުހައްމަދު މަލީހު ޖަމާލް ވިދާޅުވެއްޖެއެވެ.

މަސްވެރިންގެ ދުވަސް ފާހަގަކުރުމަށް ސަރުކާރުން ކެއުމާއި މަޖަލުގައި ދުއްވާލިއިރު ބޮޑުކަންނެލި މަސްވެރިންގެ ޔޫނިއަނުން ވަނީ މަސްވެރިންގެ ޑިމާންޑްތަކާއެކު ސުލްހަވެރި އިހުތިޖާޖެއް ފަށާފައެވެ. މި އިހުތިޖާޖަށް ސަރުކާރުގެ އެންގެވުމަށް ފުލުހުން ވަދެ ހުރަސްއެޅުމާ ގުޅިގެން އެކްސްގައި ކުރެއްވި ޕޯސްޓެއްގައި މަލީހު ވިދާޅުވީ މަސްވެރިންގެ އަޑު ސަރުކާރުން އަހަންޖެހޭކަމަށެވެ.

ހަގީގީ ސަރުކާރަކީ މަސްވެރިންކަމަށާއި ބާރުތަށް ފެށިގެން އަންނަނީ މަސްވެރިންގެ ކިބައިންކަމަށް މަލީހު ވަނީ ވިދާޅުވެފައެވެ. މަލީހުގެ ޕޯސްޓުގައި ވަނީ ދިވެހި މަސްކަނޑުތަށް ބަލަހައްޓާދެނީ މަސްވެރިންކަމަށް ވިދާޅުވެފައެވެ.

މަސްވެރިންނަށް ސަރުކާރުން އަޅާލުމަށް ގޮވާލާ މަލީހު ވަނީ މަސްވެރިންގެ ކަންބޮޑުވުންތައް ހައްުލުކޮށްދެއްވުމަށް އެދިފައެވެ. އެކަން ނުކުރެވޭނަމަ އިސްތިއުފާ ދެއްވުމަށްވެސް މަލީހު ގޮވާލާފައިވެއެވެ.

މަސްވެރިންގެ އިހުތިޖާޖުގައި މަސްވެރިން ވަނީ ސަރުކާރަށް ތިންކަމަކަށް ޑިމާންޑުކޮށްފައެވެ. އެހެންނަމަވެސް ސަރުކާރުން އެކަމަށް އެއްބަސްވެފައިނުވާތީ މަސްވެރިން ވަނީ އިހުތިޖާޖުކުރުން ހުއްޓާ ނުލާނެކަމަށްބުނެފައެވެ.