ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ ލިއޮނަލް މެސީގެ "ގޯޓް އިންޑިއާ ޓުއާ" އިވެންޓް ކޮލްކަތާގައި ބޮޑެތި ހަލަބޮލިކަންތަކަކާ އެކު ނިމިއްޖެއެވެ. މެސީއަށް މަރުހަބާ ކިޔުމަށް ރާވާފައިވާ މި އިވެންޓަކީ އިންޑިއާގައި މިހާތަނަށް ބޭއްވުނު އެންމެ ފާޑުކިޔުންތައް އަމާޒުވި އިވެންޓްތަކުގެ ތެރެއިން އެއް އިވެންޓަށް ވަނީ ބަދަލުވެގެން ގޮސްފައެވެ.
ރިޕޯޓްތައް ބުނާ ގޮތުގައި މި މައްސަލަތައް ފެށިފައިވަނީ މެސީ ސޯލްޓް ލޭކް ސްޓޭޑިއަމަށް ހާޒިރުވުމާއެކުގައެވެ. 4،500 އާއި 25،000 ޕައުންޑާ ދެމެދުގެ އަދަދަކަށް ފައިސާ ދައްކައި ޓިކެޓް ގަނެފައިވާ އެތައް ސަޕޯޓަރުން ބުނާ ގޮތުގައި، ސިޔާސީ މީހުންނާއި އޮފިޝަލުން އަދި ވީވީއައިޕީ މެހެމާނުންގެ ސަބަބުން މެސީ ރަނގަޅަށް ފެންނަން ނެތް ކަމަށެވެ. ދަނޑު ވަށައިގެން މެސީ ކުރުމަށް ރާވާފައިވާ ފުލް ލެޕް ކުރުކުރެވުނުއިރު، ހަމަނުޖެހުން އިތުރުވަމުން ދިޔަ ވަގުތު މެސީ ދަނޑުގައި ހުރީ އެންމެ 20 މިނިޓުކޮޅެކެވެ.
މާޔޫސްވި ސަޕޯޓަރުން ރިފަންޑް ހޯދުމަށް ގޮވާލައި ހަޅޭއްލަވައިގަތް ކަމަށާއި އަދި ޕްލާސްޓިކް ފުޅިތަކާއި ފައިބަރގްލާސް ގޮނޑިތައް އަދި އެހެނިހެން ތަކެތި ދަނޑަށް އުކާލައިގެން އެމީހުންގެ ރުޅިވެރިކަން ފާޅުކުރި ކަމަށް ރިޕޯޓްތަކުން ދައްކައެވެ. ބައެއް މީހުން ބެރިކޭޑްތައް ފަޅާލައިގެން ދަނޑަށް ވަންނަންވެސް މަސައްކަތްކުރިއެވެ. ފުލުހުންނަށް ޖެހުނީ ބާރު ބޭނުންކޮށް، ފަހުން އެންޓި ރިއަޓް ޓީމްތައް ގެނެސް އެއްވެ ތިބި މީހުން ކޮންޓްރޯލް ކުރުމަށެވެ.
މި ހާދިސާއާ ގުޅިގެން ފާޑުކިޔުންތައް އަމާޒުވެފައިވާއިރު ބީޖޭޕީން ބޭއްވި މި ހަރަކާތަކީ "މުޅިން ލަދުވެތި ކަމެއް" ކަމަށް ބުނެ، ޕްލޭނިން ދަށްވުމާއި ސަލާމަތީ ގޮތުން ދަށްވުމުގެ ޒިންމާ ވެސްޓް ބެންގަލްގެ ޗީފް މިނިސްޓަރު މަމަތާ ބެނާޖީ އާއި އޭނާގެ ޕާޓީގެ ބޮލުގައި އަޅުވާފައިވެއެވެ. ބެނާޖީ ވަނީ މެސީ އާއި ސަޕޯޓަރުންގެ ކިބައިން މައާފަށް އެދިފައެވެ.
ހަލަބޮލިކަމާއި ސަޕޯޓަރުންގެ ޝަކުވާތަކަށް ރައްދުދީ ކަމާބެހޭ ފަރާތްތަކުން ވަނީ ޓުއާ އިވެންޓްގެ މައިގަނޑު އިންތިޒާމް ކުރި ސަތާދުރު ދައްތާ ހައްޔަރުކޮށް، ޓިކެޓް ރިފަންޑް ވެސް ހަމަޖައްސާނެ ކަމަށް ބުނެފައެވެ. ކޮލްކަތާގައި ހަލަބޮލިކަން ކުރިމަތިވި ނަމަވެސް، ހައިދަރުއާބާދާއި މުމްބާއީ އަދި ނިއުދިއްލީގައި މަޑުކުރުމަށް ހަމަޖެހިފައިވާ މެސީގެ ދަތުރު ކުރިއަށްދާނެ ކަމަށް ރިޕޯޓްތައް ބުނެއެވެ. ނަމަވެސް، އިންޑިއާގެ ކުރިއަށް އޮތް ޝޯތަކުގައި ކްރައުން ސޭފްޓީ އާއި އިވެންޓް އޯގަނައިޒޭޝަނާ މެދު ސުވާލުތަކެއް މިހާރު ވަނީ އުފެދިފައެވެ.
