ރައްޔިތުންގެ މަޖިލީހަށް އިދިކޮޅު އެމްޑީޕީން ހުށަހަޅާފައިވާ އެންޓި-ޑިފެކްޝަން ގާނޫނު ފަރުމާކޮށްފައިވަނީ ކައުންސިލް އާ ޑަބްލިއުޑީސީ ގޮނޑިވެސް ގެއްލޭ ގޮތަށްކަން ހާމަވެއްޖެއެވެ.

ބާރަށު ދާއިރާގެ މެންބަރު އަހުމަދު އަބްދުﷲ މަޖިލީހަށް ހުށަހެޅުއްވި ބިލުގައިވާ ގޮތުން، އަތޮޅު ކައުންސިލްތަކާއި ރަށު ކައުންސިލްތަކާއި ޑަބްލިއުޑީސީ މެންބަރުން އިންތިހާބުވުމަށް ފަހު، އިންތިހާބުވި ދައުރުގެ ތެރޭގައި އިންތިހާބު ޕާޓީން ވަކިވެއްޖެ ނަމަ ނުވަތަ އެހެން ޕާޓީއަކަށް ބަދަލުވެއްޖެނަމަ ގޮނޑި ގެއްލޭނެއެވެ.

މީގެ އިތުރުން އަމިއްލަގޮތުން ހޮވުނު މެންބަރަކު ވެސް ދައުރުގެ ތެރޭގައި އެހެން ޕާޓީއަކަށް ސޮއިކޮށްފިނަމަ އިންތިހާބުވި މަގާމު ގެއްލޭނެ ކަމަށް ބިލުގައި ބުނެފައިވެއެވެ.

ބިލުގައިވާ ގޮތުން މަޖިލިސް މެންބަރަކު ސިޔާސީ ޕާޓިއަކުން ވަކި ކޮށްފިނަމަ އެ ދާއިރާގެ ރިކޯލް ވޯޓަކަށް އިލެކްޝަންސް ކޮމިޝަން (އީސީ)ން ދާން ޖެހޭނެއެވެ. އެ މެމްބަރެއްގެ ގޮނޑި ގެއްލޭނީ ދާއިރާގެ ރައްޔިތުން އޭނާ އަށް ނޫނެކޭ ބުނެފި ނަމަ އެވެ. އަދި އެ މެންބަރު އަމިއްލަ އަށް ޕާޓީން ވަކިވެއްޖެ ނަމަ އޭނާ ގޮނޑިން އިސްތިއުފާ ދެއްވަން ޖެހޭނެއެވެ.

މަޖިލީހަށް އިންތިހާބުވާ ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ މަޖިލީހުގެ މެމްބަރުކަމުން ވަކިވާނެ ކަމަށް 2017ވަނަ އަހަރު ސްޕްރީމް ކޯޓުން ކަނޑައެޅި އިރު އެންޓި ޑިފެކްޝަން ގާނޫނެއް ހަދަން ވެސް މަޖިލީހަށް ލާޒިމް ކުރި އެވެ. އެގޮތުން:

އެ ގާނޫނު މަޖިލީހުން ފާސްކޮށް އޭރުގެ ރައީސް އަބްދުﷲ ޔާމީން ތަސްދީގު ކުރެއްވިއެވެ.

ނަމަވެސް އުފެދުނު ހިޔާލު ތަފާތުވުންތަކަށް ފަހު، އެ ގާނުނޫ އުވާލަން މަޖިލީހުގެ އަގުލަބިއްޔަތުން ފާސްކުރީ 1 ނޮވެމްބަރު 2018ގައެވެ.

މި ފަދަ ބިލެއް އަނެއްކާވެސް ފާސްކުރަން އެމްޑީޕީއިން ނިންމާފައިމިވަނީ އެމްޑީޕީގެ ޓިކެޓުގައި 19 ވަނަ މަޖިލީހަށް އިންތިހާބުވުމަށްފަހު ބައެއް މެންބަރުން ޕާޓީ ބަދަލުކުރައްވާފައި ވަނިކޮށެވެ.

އެ ގޮތުން އެމްޑީޕީގެ ތެރޭގައި އުފެދުނު ހިޔާލު ތަފާތުވުންތަކުގައި ކުރީގެ ރައީސް މުހައްމަދު ނަޝީދާއި އެމަނިކުފާނަށް ތާއީދުކުރައްވާ 13 މެންބަރަކު އެމްޑީޕީ ދޫކޮށް ދަ ޑިމޮކްރެޓްސް ވަނީ އުފައްދާފައެވެ.

މީގެ އިތުރުން އެމްޑީޕީގެ 13 މެންބަރަކު މިދިޔަ އަހަރުގެ ޑިސެމްބަރު މަހު ވަނީ ވެރިކަންކުރާ ޕީއެންސީއާ ގުޅިވަޑައިގެންފަ އެވެ.

މިއީ މަޖިލިސް އިސްލާހުކުރުމަށް ކުރާ މަސައްކަތެއްގެ ގޮތުގައި އެމްޑީޕީއާ ރައްޓެހި ޕާޓީތަކާއި ގުޅިގެން ކުރާ މަސައްކަތެއް ކަމަށްވެސް އެމްޑީޕީން ވަނީ ހާމަކޮށްފައެވެ.