ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫ، އިރާނާ ދެކޮޅަށް ދޮގު ތުހުމަތުތަކެއް ކުރައްވައި، އެމެރިކާއަށް އިންޒާރު ދެއްވައިފިއެވެ.

ނަތަންޔާހޫ ވިދާޅުވީ އިރާނުން ވަރަށް އަވަހަށް އެމެރިކާގެ ސިޓީތަކަށް ނިއުކްލިއާ ހަތިޔާރުން ހަމަލާދިނުމުގެ ގާބިލްކަން ލިބިދާނެ ކަމަށެވެ.

ނަތަންޔާހޫ ބުނި ގޮތުގައި އިރާނުން ދަނީ ގާތްގަނޑަކަށް 8،000 ކިލޯމީޓަރުގެ ދުރުމިނެއް ކަމަށް ލަފާކުރެވޭ އިންޓަކޮންޓިނެންޓަލް ބެލިސްޓިކް މިސައިލް (އައިސީބީއެމް) އުފެއްދުމުގެ މަސައްކަތް ކުރަމުންނެވެ. އޭނާ އިތުރަށް ބުނީ، އިތުރު 3،000 ކިލޯމީޓަރު ދުވުމުން މި މިސައިލްތައް އެމެރިކާގެ ބޮޑެތި ސިޓީތަކަށް ފޯރާނެ ކަމަށެވެ.

ސަހްޔޫނީންގެ ބޮޑުވަޒީރު ވިދާޅުވި ގޮތުގައި ނިއުޔޯކް، ވޮޝިންޓަން، ބޮސްޓަން، އަދި މިއާމީ ފަދަ ސިޓީތައް އީރާނުގެ މިސައިލް ރޭންޖުގެ ތެރެއަށް ވަދެގެންދާނެ އެވެ. އަދި އޭނާ ވަނީ އެމެރިކާގެ ރައީސް ޑޮނަލްޑް ޓްރަމްޕްގެ މާލަގޯގެ ގެއަށް ހަމަލާތައް އަމާޒުކޮށްފާނެ ކަމުގެ އިންޒާރު ވެސް ދެއްވާފައެވެ.

މި އިންޒާރުތައް ސީރިއަސްކޮށް ނަގަން ޖެހޭ ކަމަށް ނަތަންޔާހޫ ވިދާޅުވެ، އީރާނުގެ މިސައިލް އަދި ނިއުކްލިއާ ޕްރޮގްރާމްތައް އެމެރިކާއަށް ސީދާ ނުރައްކަލަކަށް ވުމުގެ ކުރިން ހުއްޓުވުމަށް ހަރުދަނާ ފިޔަވަޅު އެޅުމަށް އިލްތިމާސް ކުރެއްވިއެވެ.