އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، އީރާނާ ދެކޮޅަށް ކުރަމުންދާ ހަނގުރާމަ އާ ހަރުފަތަކަށް ގެންދާނެ ކަމުގެ ބިރުވެރި އިންޒާރު ދީފިއެވެ.
ނަތަންޔާހޫ ބުނި ގޮތުގައި، އީރާނަށް އަމާޒުކޮށްގެން އިސްރާއީލުން ދެމުންދާ ހަމަލާތައް ކުރިއަށް އޮތް ދުވަސްތަކުގައި "ހަމައެކަނި ވަރުގަދަވާނެ" އެވެ. މިއީ މުޅި މެދުއިރުމަތި ނުތަނަވަސްކަމެއްގެ ތެރެއަށް ވައްޓާލައި، ގިނަ ބައެއްގެ ފުރާނައަށް ނުރައްކާވާނެ ފަދަ ލޭއޮހޮރުވުން ބޮޑު ނިންމުމެއްގެ ގޮތުގައި ބައިނަލްއަގުވާމީ މުޖުތަމައުން ދަނީ ސިފަކުރަމުންނެވެ.
މީގެ އިތުރުން، އެމެރިކާއާއެކު އޮތް އަސްކަރީ ގުޅުން ވަރުގަދަކޮށް، "ޓީމް އަޕް" ކުރުމުގެ ސަބަބުން އިސްރާއީލަށް ބޮޑެތި ފުރުސަތުތަކެއް ލިބިފައިވާ ކަމަށް އޭނާ ފާހަގަކުރިއެވެ. ނަތަންޔާހޫ ބުނި ގޮތުގައި މި ގުޅުމުގެ އެހީގައި، އޭނާ "40 އަހަރު ވަންދެން އެދެމުން އައި ކަންތައް" ހާސިލުކުރުމުގެ ފުރުސަތު މިހާރު ވަނީ ތަނަވަސްވެފައެވެ. މިއީ އީރާނުގެ ނިއުކްލިއަރ ވަސީލަތްތަކަށާއި އިސްތިރާޖީ މަރުކަޒުތަކަށް އަމާޒުކޮށް ބޮޑު ހަނގުރާމައެއް ފެށުމުގެ ނިޔަތުގައި ދެއްކި ވާހަކައެއް ކަމަށް މަސްރަހު ދިރާސާކުރާ ފަރާތްތަކުން ގަބޫލުކުރެއެވެ.
އިސްރާއީލުން ޣައްޒާގައާއި ލުބުނާނުގައި ހިންގަމުންދާ ލާއިންސާނީ ގަތުލުއާންމު ހުއްޓާލުމުގެ ބަދަލުގައި، ނަތަންޔާހޫ މިހާރު އަމާޒު ހިފާފައިވަނީ އެމެރިކާގެ އަސްކަރީ އެހީތެރިކަމާއެކު މުޅި ސަރަހައްދުގައި ހަނގުރާމައިގެ ހުޅުގަނޑު ފަތުރާލުމަށެވެ. މިއީ ސަރަހައްދީ ހަމަޖެހުން ނަގާލައި، އަމިއްލަ ސިޔާސީ މަގުސަދުތަކެއް ހާސިލުކުރުމަށް އޭނާ ކުރަމުންދާ ނުރައްކާތެރި މަސައްކަތެއްގެ ގޮތުގައި ގިނަ ބަޔަކު ދަނީ ފާޑުކިޔަމުންނެވެ.
