ސަރުކާރުގެ ސްކޮލާޝިޕްތަކުގައި ބޭރުގައި ކިޔަވަން ތިބި ދަރިވަރުންނަށް ސްޓައިޕެންޑު ނުލިބޭ މައްސަލަތަކާއި އެކުދިންގެ ޝަކުވާތަކާއި އެކު ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރަށް ރިޕޯޓެއް ފޮނުއްވައިފިއެވެ.

މި ރިޕޯޓު ފޮނުވާފައި ވަނީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހީމް (ކުޑޫ)އެވެ.

ދަރިވަރުންނަށް ދޭންޖެހޭ ސްޓައިޕެންޑް ނުލިބޭ މައްސަލައިގެ ޝަކުވާ ލިބިފައި ނުވާ ކަމަށް ހަޔާ އެޑިއުކޭޝަން މިނިސްޓްރީން ބުނެފައިވީ ނަމަވެސް އެ ދަރިވަރުންނަށް ބޮޑެތި ދަތިތަކާ ކުރިމަތި ވާކަމަށް ދަރިވަރުން އަންނަނީ ބުނަމުންނެވެ.

ކުޑޫ ހުށަހެޅި ރިޕޯޓުގައި ހިމެނޭ ބައެއް ކަންތައްތަކުގެ ތެރޭގައި:

• މިނިސްޓްރީން އީމެއިލްތަކަށް ޖަވާބު ނުދޭ ކަމާއި ވަޓްސްއަޕް މެދުވެރިކޮށް އެ ދަރިވަރުން ފޮނުވާ މެސެޖުތަކަށް މިނިސްޓްރީއިން ދެނީ ވަރަށް ނުސާފު ޖަވާބުތަކެއްކަމާއި، ފޯނު ނުނެގުމާއި "ސީން" ކުރުމަށް ފަހު ޖަވާބު ނުދިނުމަކީ އާންމު ކަމެއްގެ ގޮތުގައި ފާހަގަކޮށްފައިވޭ.

• ގިނަ އަދަދެއްގެ ދަރިވަރުންނަށް ދޭންޖެހޭ ސްޓައިޕެންޑް ނުލިބި 2 މަހާއި 2 މަހާ ދެމެދުގެ މުއްދަތެއް ވެފައިވާކަން.

• ޓިކެޓް ފައިސާ އާއި އެހެނިހެން ހަރަދުތަކުގެ ބަދަލު ހޯދަން ހުށަހެޅިތާ އެތައް މަހެއް ވީއިރު ވެސް ފައިސާ ޖަމާވެފައި ނުވާކަން.

މި މައްސަލަތަކުގެ އިތުރުންވެސް އެހެން މައްސަލަތަކެއް ކުޑޫގެ ރިޕޯޓުގައި ވަނީ ފާހަގަކުރައްވާފައިއެވެ. ނަމަވެސް މިނިސްޓްރީއިން ބުނަމުން އަންނަނީ މި މައްސަލަތައް މިނިސްޓްރީއިން ވަރަށް ގާތުން ބަލަމުން އަންނަ ކަމަށެވެ.

މިކަމާގުޅިގެން ދަރިވަރުން އަންނަނީ މިނިސްޓްރީގެ މި ދޮގުތައް ހާމަވާގޮތަށް ފާޅުކަންބޮޑު ގޮތުގައި ސޯޝަލް މީޑިއާގައި އީމެއިލްތައް އަދި މެސެޖުތަކުގެ ސްކީރީންޝޮޓުތައް ހިއްސާކޮށްފައިއެވެ.