މޯލްޑިވިއަނަށް ގެއްލުންވަމުންދާ މައްސަލައިގައި ޕީއެންއެފްގެ ނައިބު ރައީސް ޑރ.މުހައްމަދު ޖަމީލް އަހުމަދު ފާޑުވިދާޅުވެއްޖެއެވެ.
ޕްރައިވަޓައިޒޭޝަން ބޯޑު (ޕީސީބީ) ގެ ތަފާސްހިސާބުތަކުން ދައްކާ ގޮތުގައި މި އަހަރުގެ ފުރަތަމަ ކުއާޓަރުގައި އެ ކުންފުންޏަށް 46 މިލިއަން ރުފިޔާގެ ގެއްލުން ވަނީ ވެފަ އެވެ. މިދިޔަ އަހަރުގެ ފުރަތަމަ ކުއާޓަރުގައި 47 މިލިއަނުގެ ފައިދާއެއް ނެރުނު ނަމަވސް 2024 ވެސް މޯލްޑިވިއަން ނިންމާލީ ގެއްލުމުގަ އެވެ.
ޝާކިރު ހުށަހެޅުއްވި މައްސަލާގައި ވަނީ މިދިޔަ އަހަރާ އަޅާބަލާއިރު މި އަހަރުގެ ގްރޮސް މާޖިން ދަށްވެފައިވާ ކަމުގެ ކަންބޮޑުވުން ފާޅުކޮށްފަ އެވެ. މިދިޔަ 2024 ގެ ފުރަތަމަ ކުއާޓަރުގައި އެ ކުންފުނީގެ ގްރޮސް މާޖިން ހުރީ 44 ޕަސެންޓުގައި ކަމަށްވާއިރު މި އަހަރުގެ ފުރަތަމަ ކުއާޓަރުގައި އެ އަދަދު ހުރީ 32 ޕަސެންޓުގަ އެވެ.
މިދިޔަ 12 މަސް ދުވަހުގެ ތެރޭގައި އާދަޔާ ހިލާފަށް ގިނައިން އެ ކުންފުނީގެ މަތިންދާބޯޓުތައް ގްރައުންޑުކޮށްފައިވާ ކަމަށް ޝާކިރުގެ މައްސަލާގައި ފާހަގަކޮށްފައިވެ އެވެ. ފްލައިޓު ލޮގުތަކަށް ބަލާއިރު މިދިޔަ އަހަރުގެ ސެޕްޓެމްބަރުން ފެށިގެން މި އަހަރުގެ މާޗުގެ ނިޔަލަށް މޯލްޑިވިއަންގެ އެއް A320 ދަތުރެއް ނުކުރެ އެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ޑރ.ޖަމީލް ވިދާޅުވީ މިކަންތައް މިހިސާބަށް ދިޔައީ ނޭނގިތިބެގެނެއް ނޫންކަމަށާއި ޓްރާންސްޕޯޓް މިނިސްޓަރ އަހުމަދު އަމީންގެ މައްޗަށް މި ކަމުގައި ކުރެވޭ ބޮޑު ތުހުމަތެއް އެބައޮތްކަމަށެވެ.
އެންމެ ފުރަތަމަވެސް ނިޔަތް ގޯސްކަމަށާއި މިއަދު މިސްރާބު ހިފާފަ އެއޮތީ ކޮން މަސްލަޙަތެއް ހިމާޔަތްކުރަންކަމެއް ނޭނގޭކަމަށް ވެސް އެ ޕޯސްޓުގައި ޑރ.ޖަމީލް ވަނީ ވިދާޅުވެފައެވެ. ދެން އަޑު އިވޭނީ ބޭރުބަޔަކަށް ކުންފުނިވެސް ވިއްކާލާ ވާހަކަނޫންތޯ އައްސަވާ ސުވާލު އުފައްދާފައިވެސްވެއެވެ.
ކޮންމެ ކަމެއްވެސް މިސަރުކާރުން ކުރަނީ އަޑީގައި ތިބެގެން ބޮޑު ނާޖާއިޒު މަންފާއެއް ނެގުމަށްކަމަށާއި ބައެއް ވަޒީރުންނަކީ މިގޮތުން ވަރަށް ކުރީގައި އުޅުއްވާ ބައެއްކަމަށް ވެސް ޑރ.ޖަމީލް ވަނީ ވިދާޅުވެފައެވެ.
