ކަމެއް ކޮށްދޭނެ ކަމުގެ އުއްމީދު ރައްޔިތުންނަށް ދިނަސް މުއިއްޒު ދެމުންދަނީ ހުސްވެސް ދޯކާ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރައީސް ޔާމީން މިފަދައިން ފާޑުވިދާޅުވީ މިރޭ ޕީއެންއެފް (ޕީޕަލްސް ނެޝަނަލް ފްރަންޓް) އިން ބޭއްވި ޓައުން ހޯލް ޖަލްސާގައި ވާހަކަފުޅު ދައްކަވަމުންނެވެ.
ރައީސް ޔާމީން ވާހަކަފުޅު ދައްކަވަމުން ވިދާޅުވީ، ރައީސް މުއިއްޒު ރަށްރަށަށް ގޮސް މަޝްރޫއެއް ހިންގާ ކަމަށް ރައްޔިތުންނަށް ދައްކަފާނެ ކަމަށާއި، ނަމަވެސް ދުވަސްކޮޅަކުން ކަމެއް ފެށުނުކަންވެސް މުއިއްޒު ހަނދާނެއްވެސް ނުހުންނަ ކަމަށެވެ. މިކަމުން ދައްކުވައިދެނީ ސަރުކާރުން ކުރާ ކަންކަމުގައި ތެދުކަން ނެތްކަމަށް ރައީސް ޔާމީން އިޝާރާތް ކުރެއްވިއެވެ.
އެމަނިކުފާނު އިތުރަށް ވިދާޅުވީ، ކަންތައްތައް ކުރަން ބަޖެޓުގައި ފައިސާ ޖަހައިގެން މުއިއްޒު އުޅުއްވަނީ ރައްޔިތުންނާ ދޮގާއި އޮޅުވާލުމާއި މަކަރާއި ހީލަތް ހެދުމުގައި ކަމަށެވެ. މިއީ ރައްޔިތުންނަށް ދޮގު މައުލޫމާތު ދީ، އެމީހުންގެ އިތުބާރު ނަގާލުމުގެ އަމަލެއް ކަމަށް ރައީސް ޔާމީން ސިފަކުރެއްވިއެވެ.
މިކަމާ ގުޅިގެން މީގެ ކުރީގެ ސަރުކާރުތަކާ އަޅުއްވައި ކިޔައިދެއްވަމުން ރައީސް ޔާމީން ވިދާޅުވީ، އިންތިޚާބެއް ބޯމަތިވާ ކަމަށް ވަންޏާ ކުރީގެ ރައީސް މައުމޫނުގެ ސަރުކާރުގައިވެސް ރައްޔިތުންނަށް އެންމެ ދަތިވެފައިވާ ބަނދަރު މައްސަލައަށް ހައްލު ހޯއްދުމަށް ބަނދަރު ބޮޑުކޮށް ފުންކޮށް މަސައްކަތް ކުރާތަން ފެންނާނެ ކަމަށެވެ. ނޫނީ ކޮންމެވެސް މަސައްކަތެއް ކުރާ ކަން ދައްކާނެ ކަމަށާއި، އެ އިންތިޚާބު ކާމިޔާބުވުމުން އެކަން އެނިމުނީ ކަމަށް އެމަނިކުފާނު ވިދާޅުވިއެވެ.
"އެއީ މީގެ ތިރީސް ސާޅީސް އަހަރު ކުރިން ހަމައެހެން ނޫންތޯ މިހާރުވެސް އެއްވެސް ތަފާތެއް އައިތޯ؟ ގައުމު ސޮއްސާލީ ފަހަތަށޭ،" ރައީސް ޔާމީން މިރޭ ޕީއެންއެފް ޖަލްސާގައި ރައީސް މުއިއްޒުގެ ސަރުކާރަށް ފާޑުވިދާޅުވަމުން ވިދާޅުވިއެވެ.
އެމަނިކުފާނުގެ ވާހަކަފުޅުގައި މިހާރުވެސް ފެންނަނީ އެއްވެސް ތަފާތެއް ނެތް ކަމާއި، ގައުމު އިތުރަށް ފަހަތަށް ޖެހެމުންދާ ކަމުގެ ކަންބޮޑުވުން ފާޅުކުރެއްވިއެވެ. ޤައުމު ދާން ޖެހޭނީ ކުރިއަށް ކަމަށާއި ގައުމު ފަހަތަށް ދަންޏާ އެއީ ސަރުކާރުގެ ހުންގާނުގައި ތިއްބެވީ ނާގާބިލު ބަޔެއްކަން ހާމަވާ ސިފައެއްކަމަށްވެސް ރައީސް ޔާމީންގެ ވާހަކަފުޅުގައި ފާހަގަކުރެއްވިއެވެ.
