މަސްތުވާތަކެތީގެ މައްސަލަތަކުގައި ރިހިބިލިޓޭޝަން ފަރުވާ ފުރިހަމަ ކުރަން ހުކުމްކުރާ މީހުންނަށް ނެޝަނަލް ޑްރަގު އެޖެންސީ (އެންޑީއޭ) އިން ދޭން ޖެހޭ ފަރުވާގެ ލިއުން ވިއްކާ، މަނީ ލޯންޑަ ކުރި މައްސަލައެއް ތަހުގީގުކުރަން ފަށައިފި އެވެ.
ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ޑެޕިއުޓީ ޕޮލިސް ކޮމިޝަނަރު އިސްމާއިލް ނަވީން ވިދާޅުވީ އެންޑީއޭގެ އިސް ވެރިންތަކަކާއި އިތުރު ބަޔަކު ގުޅިގެން، އެ އެޖެންސީން ދެމުންދާ ފަރުވާގެ އެސެސްމަންޓް ރިވިއު ކުރުމުގައި ހިންގާފައިވާ ކަމަށް ތުހުމަތު ކުރެވޭ ރިޝްވަތާއި މަނީ ލޯންޑަރިންގެ މައްސަލައެއް ތަހުގީގު ކުރަމުންދާ ކަމަށެވެ.
ނަވީން ވިދާޅުވީ އެ މައްސަލާގައި ތުހުމަތުކުރެވޭ ދެ މީހަކު ދިރިއުޅޭ ތިން ތަނަކާއި އެންޑީއޭ ހިންގަމުން އަންނަ ތަންތަން ބަލައި ފާސްކޮށްފައިވާ ކަމަށެވެ.
އަދި މައްސަލައާ ގުޅޭ ލިޔެކިއުންތަކާއި އިލެކްޓްރޯނިކްސް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ވެސް އޭނާ ވިދާޅުވި އެވެ.
ނަވީން ވިދާޅުވީ އެ މައްސަލައާ ގުޅޭ އިތުރު ތަފްސީލުތައް އަންނަ އާދީއްތަ ދުވަހު ބާއްވާ ނޫސްވެރިންގެ ބައްދަލުވުމެއްގައި ހާމަކުރާނެ ކަމަށެވެ.
