މިދިޔަ މަހުގެ 12 ވަނަ ދުވަހުގެ ރޭ އަނިޔާވެރިގޮތަކަށް މަރާލާފައި އޮއްވާ އއ. މާޅޮހުން ފެނުނު، އަބްދުއްރަހުމާން އާދަަމް (65)ގެ މަރުގެ މައްސަލާގައި 3 މީހަކު ހައްޔަރުކޮށްފި އެވެ.
މި މައްސަލާގައި ފުލުހުން މިއަދު ބުނީ ޢަބްދުއްރަހުމާން އާދަމް މަރާލުމުގައި ބައިވެރިވިކަމުގެ ތުހުމަތުގައި 3 މީހަކު ހައްޔަރު ކޮށްފައިވާކަމަށެވެ. އަދި މިކަމުގެ އިތުރު ތަފްސީލް ފަހުން ހާމަކުރާނެކަމަށް ފުލުހުން ބުނެފައިވެއެވެ.
ތޭރައޮންލައިނަށް މައުލޫމާތު ލިބުނު ގޮތުގައި މައްސަލާގައި ތުހުމަތު ކުރެވޭ 3 މީހެއްގެ ގެ މި މަހު ކުރީކޮޅު ބަލާ ފާސްކޮށް އެކެއްގެ އަންނައުނު ވެސް ފުލުހުން ގެންގޮސްފައިވެއެވެ. އަދި ފުލުހުން ހައްޔަރުކޮށްފައި ވަނީވެސް މި 3 މީހުންނެވެ. އަބްދުއްރަހުމާނު މަރާލާފައި އޮއްވާ ފެނުނުރޭ ގެ ދަންވަރު ރަށުތެރޭގައި މި ތިން މީހުން ހޭލާ އުޅުނުކަމަށް ވެއެވެ.
އަބްދުއްރަހްމާނަށް ފަރުވާދޭން މާޅޮހު ސިއްހީ މަރުކަޒަށް ގެންދިޔަކަމަށް ފުލުހުންނަށް ރިޕޯޓުކުރީ 13 ވަނަ ދުވަހުގެ ރޭ ދަންވަރު 1:50 ހާއިރެވެ. އޭނާ މަރުވީ ފަތިހުގެ ވަގުތެއްގައި ސިއްހީ މަރުކަޒުގައި ފަރުވާ ދެނިކޮށެވެ.
އަބްދުއްރަހުމާނަށް ހަމަލާ ދީފައިވަނީ ގޭގައި ނިދާފަ އޮއްވައެވެ. އަބްދުއްރަހުމާނަށް ހަމަލަދިން ރޭ އެ ދެމަފިރިން ނިދީ ދެ ކޮޓަރީގަ އެވެ. އަދި އަބްދުއްރަހުމާނުގެ ދެމަފިރިންގެ ތިން ފިރިހެންކުދިންގެ ތެރެއިން ރަށުގައި ދިރިއުޅޭ ހަމައެކަނި ދަރިފުޅުވެސް އެ ދުވަސްވަރު ހުރީ މާލޭގަ އެވެ
