ރައީސް ޑރ މުހައްމަދު މުއިއްޒުގެ ސަރުކާރުގައި އެމްއޭސީއެލްގެ ސިޔާސީ މަގާމެއްގައި ހުރި މަރިޔަމް ޝިއުނާ، މާލޭގެ މޭޔަރުކަމަށް ވާދަކުރައްވާ ގައުމީ ކެންޑިޑޭޓު އިސްމާއިލް ޒަރިޔަންދުއާ އަޅައިިިިިިިިިިިިިގަނެފިއެވެ.

ޕީއެންއެފްގެ ރައީސް، ރައީސް އަބްދުﷲ ޔާމީން، ޒަރިޔަންދު މާލޭގެ މޭޔަރުކަމަށް ނިކުތުމަށް އެންޑޯޒުކުރެއްވުމުން އެކަން ހަޖަމްނުވެގެން ޝިއުނާ ވަނީ އެކްސްގައި ޕޯސްޓެއްކޮށްފައެވެ. ޝިއުނާ ވަނީ ކޮރަޕްޝަންގެ އަމަލުތައް ހުއްޓުވަން ރައީސް ޔާމީންގެ ޓިކެޓުގައި ނިކުންނަނީ ކަމަށް ބުނެފައެވެ.

ޝިއުނާގެ މި ވާހަކައަށް ޒަރިޔަންދު ވަނީ ރައްދު ދެއްވާފައެވެ. އެގޮތުން ޒަރިޔަންދު ވިދާޅުވީ، ޤައުމީ މަސައްކަތެއްގެ އެންމެ ބޮޑު ބޭނުމަކީ އަމިއްލަ ހައިބަތާއި ޖާހާއި މަންފާއަށް ވުރެ ރައްޔިތުންނަށް ތެދުވެރި އަމާނާތްތެރި ޚިދުމަތެއްކުރުމުގެ ނިޔަތް ކަމަށެވެ. އަދި އެފަދަ ހިދުމަތަކަށް ޝިއުނާއާއި އެހެނިހެން ފަރާތްތަކުން ތާއިދުގެ "ޓިކެޓް" ދެއްވާނަމަ އެފަރާތްތަކަށް ޝުކުރު ރައްދުކުރާ ކަމަށްވެސް ޒަރިޔަންދު ވަނީ ވިދާޅުވެފައެވެ.

ޒަރިޔަންދު މިފަދައިން ވިދާޅުވެފައިވާއިރު، އޭނާއަށް ވަނީ ޕީއެންއެފްެ އެންޑޯޒްމަންޓު ލިބިފައެވެ. ޒަރިޔަންދު ކައުންސިލްއަށް ވާދަކުރައްވާނީ ނަމަވެސް މިނިވަން ކެންޑިޑޭޓެއްގެ ގޮތުގައެވެ. ޒަރިޔަންދު ކުރިން ވިދާޅުވެފައިވަނީ މޭޔަރުކަމަށް ސިޔާސީ ފިކުރުން ތަތްތެޅިފައި ތިބި ބަޔަކު އައިސްފި ނަމަ ރައްޔިތުންނަށް ޚިދުމަތްކުރުމަށް އެބަޔަށް ވަގުތު ނޯންނާނެ ކަމަށާ އެބަޔަކު އުޅޭނީ ޕާޓީ ޕްރޮމޯޓުކުރުމުގައި ކަމަށެވެ.