ދައުލަތުގެ ބަޖެޓުން އަމިއްލަ މީޑިއާތަކަށް ދޭ މާލީ އެހީތެރިކަން ދިނުން ވަގުތުން ހުއްޓާލަން މޯލްޑިވްސް ޖާނަލިސްޓު އެސޯސިއޭޝާން (އެމްޖޭއޭ)އިން ގޮވާލައިފިއެވެ.
އެމްޖޭއިން ނެރުނު ނޫސް ބަޔާނެއްގައި ބުނެފައިވާ ގޮތުގައި މީޑިއާ ގްރާންޓް) ދޭން އުޅެނީ ހާމަކަންބޮޑު އުސޫލެއްގެ ތެރެއިން ނޫންކަމަށެވެ.
އެ ޖަމްއިއްޔާއިން ތުހުމަތުކުރާ ގޮތުގައި އަވަސް އަރުވާލައިގެން މީޑިއާ ގްރާންޓް ދިނުމުގެ ނަމުގައި އުސޫލެއް ހަދައި، ދެފުށް ފެންނަ ހާމަކަން ބޮޑު ނޫން އުސޫލެއްގެ ތެރެއިން ރައްޔިތުންގެ ޓެކްސް ފައިސާއިން 39 މީޑިއާއަކަށް 28 މިލިއަން ރުފިޔާ ދޭން ކަމަށާ އެ މަސައްކަތް ހުއްޓާލަން ގޮވަލާ ކަމަށެވެ.
މީގެ އިތުރުން މީޑިއާ ގްރާންޓް ދިނުމުގެ މަސައްކަތް މޯލްޑިވް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އާ ހަވާލުވި ފަހުން މީޑިއާތަކުގެ ހިޔާލު ހޯދުމަށް ބޭއްވީ އެންމެ ބަައްދަލުވުމެއް ކަމަށާއި ފައިސާ ދޭ އުސޫލަށް އާންމުންގެ ހިޔާލު ހޯދުމަށް ވެސް މަސައްކަތް ނުކުރާ ކަމަށް އެމްޖޭއޭއިން ބުުނެފައިވެއެވެ.
އަވަސް އަރުވާލައިގެން މީޑިއާތަކަށް ފައިސާ ދޭން މަސައްކަތް ކުރުމުން ގްރާންޓަށް އެދުނު މީޑިއާތަކުގެ ތެރެއިން ގަވާއިދުން ކޮންޓެންޓް ގެނެސް ނުދޭ، އާންމުންނަށް ވެސް ނޭނގޭ އެތައް މީޑިއާއެއް ހިމެނޭ ގޮތަށް ފައިސާ ދޫކުރުމަށް ނިންމާފައިވާކަން ފާހަގަކޮށް އެމްޖޭއޭއިން ބުނެފައިވަނީ ޑިއާތަކަށް ޕޮއިންޓް ދިންގޮތް އާންމު ކޮށްފައި ހުރި ނަމަވެސް، ޕޮއިންޓް ދިނުމުގައި އިންސާފުވެރިކޮށް އެކަން ކޮށްފައިވާކަމާ މެދު ޝަކުވާތައް ވެސް ވަނީ ބޮޑުވެފައި ކަމަށާއި ޕޮއިންޓް ދީފައިވާ ގޮތާމެދު ޝައްކު އުފައްދަން އެކަށީގެންވާ ސަބަބުތައް ހުރިކަމަށް ވެސް ފާހަގަކުރެވޭ ކަމަށެވެ.
ނޫސްވެރިންގެ މަސައްކަތްތެރިކަމުގެ އަސާސީ ހައްގުތަކަށް (ގަވާއިދުން މުސާރަ ދިނުން، ޕެންޝަން ދެމުން ދިޔުން ފަދަ ކަންކަމަށް) އިހުތިރާމްކުރާ މީޑިއާތަކަށް މީޑިއާ ގްރާންޓްގައި ބަލާފައި ނުވާތީ އެކަމާ ވެސް އެމްޖޭއޭއިން ވަނީ ހިތާމަކުރާ ކަމަށް ބުނެފައެވެ.
އެމްޖޭއޭއިން މިފަދަ ކަންކަން ފާހަގަކޮށްފައިވާއިރު، ސަރުކާރުން ދޭ މާލީ އެހީކަމަށް ބުނާ ފައިސާ ލިބުނު މީޑީޔާތަކުގައި ގިނައީ ސަރުކާރު ޕްރޮމޯޓުކުރަން އުފައްދާފައިވާ ރަޖިސްޓްރީ ވެސް ނުކޮށް ހުރި މީީޑިޔާތައް ކަމަށް ދައްކައެވެ.
