އިންޑިއާގެ ބޮޑުވަޒީރު ނަރެންދުރަ މޯދީގެ ސަރުކާރުން، އިންޑިއާގެ ބާރުގެ ދަށުގައި އޮންނަ ކަޝްމީރުގެ ހިންދޫންނަށް ހަތިޔާރު ފޯރުކޮށްދީ، ހަނގުރާމަވެރި ތަމްރީނުތައް ދޭން ފަށައިފިއެވެ. "ވިލެޖް ޑިފެންސް ގާޑްސް" (ވީޑީޖީ) ގެ ނަމުގައި ހިންގާ މި ހަރަކާތުގެ ދަށުން، ކަޝްމީރުގެ ޖައްމޫ ސަރަހައްދުގައި ދިރިއުޅޭ ހިންދޫންނަށް ބަޑި ޖަހާނެ ގޮތާއި، ދިފާއީ އުކުޅުތައް އިންޑިއާގެ ސިފައިން ދަނީ ދަސްކޮށްދެމުންނެވެ. މިއީ އެ ސަރަހައްދުގައި އުޅޭ މުސްލިމުންނާ ދެކޮޅަށް ހިންގޭ ނުރައްކާތެރި އަމަލެއްގެ ގޮތުގައި ގިނަ ބަޔަކު ސިފަކުރެއެވެ.

މި މަޝްރޫއުގެ މައިގަނޑު ބޭނުމަކީ ކަޝްމީރުގައި ހަރަކާތްތެރިވާ މިނިވަންކަމަށް މަސައްކަތްކުރާ ޖަމާއަތްތަކުން ދޭ ހަމަލާތަކުން ސަލާމަތްވުން ކަމަށް އިންޑިއާ ސަރުކާރުން ބުނެއެވެ. ނަމަވެސް، އިންސާނީ ހައްގުތަކަށް މަސައްކަތްކުރާ ފަރާތްތަކުން ބުނާ ގޮތުގައި، އާންމު ރައްޔިތުންގެ ތެރެއިން ވަކި ދީނެއްގެ ބަޔަކަށް ހަތިޔާރު ދިނުމަކީ މަދަނީ ހަމަނުޖެހުމަކަށް މަގުފަހިވާނެ ކަމެކެވެ. އަދި މިއީ ކަޝްމީރުގެ މުސްލިމުން ބިރުގަންނަވައި، އެމީހުންގެ މައްޗަށް ބާރު ފޯރުވުމަށް މޯދީ ސަރުކާރުން ރާވައިގެން ހިންގާ ކަމެއް ކަމަށްވެސް ތުހުމަތު ކުރެވެއެވެ.

މިކަމާ ގުޅިގެން ކަޝްމީރުގެ މުސްލިމް އާބާދީގެ މެދުގައި ބޮޑު ބިރުވެރިކަމެއް ވަނީ އުފެދިފައެވެ. އެފަރާތްތަކުން ގަބޫލުކުރާ ގޮތުގައި، ހިންދޫ ހަރުކަށި ފިކުރުގެ މީހުންނަށް ދައުލަތުން ހަތިޔާރު ދިނުމަކީ މުސްލިމުންނާ ދެކޮޅަށް ލޭއޮހޮރުވުމެއް ހިންގުމަށް ހުޅުވައިދޭ ދޮރެކެވެ. މީގެ ކުރިންވެސް މިފަދަ ގްރޫޕްތަކުން ކަޝްމީރުގެ އާންމު ރައްޔިތުންނަށް އަނިޔާކޮށް، އިންސާނީ ހައްގުތަކާ ހިލާފު އެތައް އަމަލެއް ހިންގާފައިވާކަން ފާހަގަކުރެވެއެވެ.

ބައިނަލްއަގުވާމީ މުޖުތަމައުންވެސް ދަނީ މިކަމާ މެދު ކަންބޮޑުވުން ފާޅުކުރަމުންނެވެ. ހާއްސަކޮށް، މޯދީ ސަރުކާރުން ކަޝްމީރުގެ ހާއްސަ ދަރަޖަ އުވާލި ފަހުން، އެ ސަރަހައްދުގެ މުސްލިމުންގެ ހައްގުތައް ނިގުޅައިގަނެ، ހިންދޫންގެ ބާރުވެރިކަން އިތުރުކުރުމަށް ގިނަ މަސައްކަތްތަކެއް ކުރަމުންދާ ކަމަށް ގިނަ ފަރާތްތަކަކުން ދެކެއެވެ. މި އާ މަޝްރޫއުގެ ސަބަބުން ކަޝްމީރުގެ ސުލްހަ މަސަލަސްކަން އިތުރަށް ގެއްލި، ނުރައްކާތެރި ހަމަނުޖެހުންތަކަކަށް މަގުފަހިވެގެންދާނެ ކަމުގެ އިންޒާރު މުހައްލިލުން ދެއެވެ.