އައު އަހަރު ފާހަގަކުރުމުގެ ގޮތުން މާލޭގައި ހަވާ އެރުވުމުގެ އިތުރުން ބޭއްވި ކުލަގަދަ ޑްރޯން ޝޯވްއަކީ ގިނަ ބައެއްގެ ސަމާލުކަން ހޯދި ހަރަކާތެކެވެ. ނަމަވެސް، މި ޝޯވްގެ ތެރެއިން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސޫރަ އާއި ޝަހުސު ވައިގެ ތެރޭގައި ކުރަހާލުމާއެކު، އާންމުންގެ މެދުގައި ވަނީ ބޮޑު ބަހުސެއް އުފެދި، ސޯޝަލް މީޑިއާގައި ފާޑުކިޔުންތައް އަމާޒުވެފައެވެ.
މިކަމާ ގުޅިގެން ގިނަ ބަޔަކު ފާހަގަކުރި އެންމެ ބޮޑު އެއް ނުކުތާއަކީ، ދައުލަތުގެ ވަސީލަތްތަކާއި ރައްޔިތުންގެ ފައިސާ ބޭނުންކޮށްގެން ވެރިމީހާގެ އަމިއްލަ ޝަހުސު އިސްތިހާރުކޮށް ޕްރޮމޯޓު ކުރުމަކީ ތަހުޒީބު މުޖުތަމައުތަކުގައި ބަލައިގަންނަ ކަމެއް ނޫން ކަމެވެ. ދުނިޔޭގެ ތާރީޚަށް ބަލާއިރު، މިފަދަ ގޮތްގޮތަށް ވެރިންގެ ފޮޓޯ އާއި ސޫރަ އާންމު ތަންތަނުގައި ބޮޑުކޮށް ދައްކައިގެން ޝަހުސު މަތިވެރިކުރަން މަސައްކަތް ކުރަނީ އާންމުކޮށް ހުދުމުހުތާރު ވެރިން ކަމަށް ބުނެ ގިނަ ބަޔަކު ވަނީ ނުރުހުން ފާޅުކޮށްފައެވެ.
ސޯޝަލް މީޑިއާގައި، ހާއްސަކޮށް "ޖެންޒީ"ން މެދުގައި މި ހަރަކާތް ވެގެންދިޔައީ ބޮޑު މަލާމާތަކަށެވެ. އޭއައި ބޭނުންކޮށްގެން ތަފާތު ވީޑިއޯތައް ހަދައި، ނެޓްފްލިކްސްގެ މަޝްހޫރު ސީރީސް "ސްޓްރޭންޖާ ތިންގްސް" ގައި ފެންނަ ނުބައި ކެރެކްޓާއެއް ކަމަށްވާ 'ވެކްނާ' އާ ރައީސް މުއިއްޒުގެ ޑްރޯން ސޫރަ ވައްތަރު ކަމަށް ބުނެ ގިނަ 'މީމް' ތަކެއް ވަނީ ދައުރުވާން ފަށާފައެވެ. މިކަމުގެ ސަބަބުން ސަރުކާރުން ބޭނުންވި ހައިބަތުގެ ބަދަލުގައި، މުޅި މަންޒަރު ބަދަލުވެގެން ދިޔައީ މަޖާޒީ އަދި ފުރައްސާރަ ރައްދުވާ ކަމަކަށެވެ.
މީގެ އިތުރުން، ރައްޔިތުންގެ ފައިސާއިން ގައުމުގެ ވަލިއްޔުލްއަމްރު އަމިއްލަފުޅަށް ޕްރޮމޯޓުވުމަށް މިފަދަ އުކުޅުތައް ބޭނުންކުރުމަކީ އަޚުލާގީ ގޮތުން ވެސް ހަޑި ކަމެއްގެ ގޮތުގައި ގިނަ ބަޔަކު އިއްތިފާގުވެއެވެ.
ޖުމްލަގޮތެއްގައި، އައު އަހަރުގެ މި ޑްރޯން ޝޯވް ސަރުކާރުން ރޭވީ ރައީސްގެ މަގުބޫލުކަން އިތުރުކުރުމުގެ މަގްސަދުގައި ކަމަށް ވިޔަސް، ނަތީޖާ ފެނުނީ އޭގެ އިދިކޮޅަށެވެ. ޝަހުސު ދައްކާލަން އުޅުމުގެ ތެރެއިން އެކަން ވެގެންދިޔައީ މުޅި ސޯޝަލް މީޑިއާގައި ދައުރުވާ ބޮޑު "މީމް" އަކަށެވެ.
ދައުލަތުގެ ބަޖެޓުން ބޮޑު ހޭދައެއް ކޮށްގެން މިފަދަ "ޕާސަނަލިޓީ ކަލްޓް" އެއް އުފަންކުރަން އުޅުމަކީ ޑިމޮކްރެޓިކް ނިޒާމެއްގައި ބަލައިގަނެވޭނެ ކަމެއް ނޫނެވެ. ރައްޔިތުން ތިބީ އަސާސީ ޚިދުމަތްތަކާއި އިގްތިސާދީ ދަތިކަމުގެ ތެރޭގައި ކަމަށްވާއިރު، އުޑުމަތީގައި ރައީސްގެ ސޫރަ ކުރަހައިގެން ހައިބަތު ދައްކަން އުޅުމަކީ ރައްޔިތުންނަށް ކުރެވޭ މަލާމާތެކެވެ.
