ރާއްޖޭގެ މައި ދޮރާށި އިންޑިއާއަށް ވިއްކާލި، ކުރިގެ ރައީސް މުހައްމަފު ނަޝީދު ބޭނުންވަނީ ހަނިމާދޫ އެއާޕޯޓުވެސް އިންޑިއާއާ ގުޅިގެން ހިންގަން ކަމަށް ދޭހަވާ ފަދަ މޭރުމަކުން ވާހަކަދައްކަވައިފިއެވެ.
ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ހަނިމާދޫ އެއާޕޯޓަކީ ސަރަހައްދީ އެއާލައިނެއްގެ ހަބަކަށް ހަދަން އެ އެއާލައިންއާ ގުޅިގެން އެ އެއާޕޯޓު ހިންގުމުން ދިވެހިންނަށް ލިބޭނެ ފައިދާ ބޮޑުވާނެ ކަމަށެވެ. އަދި ނަޝީދުގެ ނަޒަރުގައި އޭގެ ސަބަބުން މުޅި ބޮޑު އުތުރު ތަރައްގީ އަށް ފަހިވާނެއެވެ.
ނަޝީދުގެ މި ޚިޔާލަށް ގިނަ ބައެއްގެ ނުރުހުމާ ފާޑުކިޔުން އަމާޒުވެފައިވެއެވެ. އެގޮތުން އެ ޕޯސްޓަށް ޖަވާބުދިން ބައެއް މީހުން ވަނީ ނަޝީދު ޖީއެމްއާރަށް ރާއްޖޭގެ ބައިނަލްއަގްވާމީ ވައިގެ ބަނދަރު އެންމެ 78 މިލިއަން ޑޮލަރަށް ވިއްކާލި ވިއްކާލުން ހަނދާނަށް ގެނެސް، ރާއްޖޭގެ އެއްވެސް އެއާޕޯޓެއް ހަބަކަށް ހެދުމުގެ ނިޔަތުގައި ބޭރު ގައުމެއް އެއާލައިނަކަށް ފުރުސަތު ދިނުމުން ރާއްޖެއަށް އެކަމުގައި ވާނެ ފައިދާއެއް ނޯންނާނެ ކަމަށް ބުނެފައެވެ.
އެހެންކަމުން ހަނިމާދު ހަބަކަށް ހަދަން ބޭނުންނަމަ އެ ރަށުގެ އެއާޕޯޓަށް ބޭނުންކުރަންވި ގައުމި އެއާލައިން މޯލްޑިވިއަން ކަމަށް ވެސް ބުނެފައިވެއެވެ. އަދި ދިވެހިރާއްޖެ މިހާރުވެސް ގެންދަނީ ނަޝީދުގެ ދައުރުގައި ޖީއެމްއާރަށް އެއާޕޯޓު ވިއްކާލި ވިއްކާލުމުގެ ގެއްލުން ތަހައްމަލު ކުރަމުން ކަަމަށްވެސް އާންމުން ވަނީ ބުނެފައެވެ.
