ފުލުހުންގެ ފަރާތުން ލިބޭ އަނިޔާތަކާއި ގުޅޭ މައްސަލަތަކުގައި ހާދިސާއާއި ގުޅުންހުރި ބޮޑީވޯން ކެމެރާ ފުޓޭޖު ފުލުހުންގެ އަތުގައި ނުހުންނަ ކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން ބުނެފިއެވެ.

އެ ކޮމިޝަނުގެ އަހަރީ ރިޕޯޓުގައި ބުނެފައިވާ ގޮތުގައި ދިވެހި ފުލުހުންގެ ޚިދުމަތާއި މޯލްޑިވްސް ކަރެކްޝަނަލް ސާވިސްއިން ބޮޑީވޯން ކެމެރާ ބޭނުންކުރަން ފަށާފައިވީނަމަވެސް، ބައެއް އޮޕަރޭޝަންތައް އަދި ހާދިސާތަކުގައި ހަރަކާތްތެރިވާ އޮފިސަރުން ބޮޑީވޯން ކެމެރާ ހަރުކޮށްފައި ނުހުރެއެވެ.

އަދި ބޮޑީ ވޯން ކެމެރާ ހަރުކޮށްފައި ހުރިނަމަވެސް ބައެއް ފަހަރު ކެމެރާ އޮން ނުކޮށް ހުންނަކަން އެ ކޮމިޝަނުން ތަހުޤީގުކުރެވުނު މައްސަލަތަކުން ފާހަގަކުރެވިފައިވާ ކަމަށް އެ ރިޕޯޓުގައިވެއެވެ.

ފުލުހުން ހިިންގާ ބޮޑެތި އޮޕަރޭޝަންތަކުގައި ބޮޑީވޯން ކެމެރާ ބޭނުން ނުކުރުމާއި ބޮޑީވޯން ކެމެރާ ބޭނުންކުރާ ހާލަތްތަކުގައި ވެސް އޮޕަރޭޝަން ފެށިގެން ނިމެންދެން ކެމެރާ އޮންކޮށްފައި ނުބަހައްޓާކަން އެޗްއާރުސީއެމުން ވަނީ ފާހަގަކޮށްފައެވެ.

ހާއްސަކޮށް ފުލުހުންގެ ފަރާތުން އަނިޔާ ލިބުނު ކަމަށް ބުނެ އެ ކޮމިޝަނަށް ހުށަހަޅާފައިވާ މައްސަލަތައް ތަހުޤީގުކުރުމުގައި ފުލުހުންގެ ބޮޑީވޯން ކެމެރާގެ ފުޓޭޖްތައް ނުލިބޭކަން އެޗްއާރްސީއެމްއިން ފާހަގަކުރިއެވެ.

މިކަމަށް ހައްލެއް ހޯދުމަށް ފުލުހުންގެ އިސް ފަރާތްތަކާއެކު މިދިޔަ އަހަރު ބައްދަލުވުންތައް ބޭއްވި ކަމަށާއި އެފަދަ އޮޕަރޭޝަންތަކުގައި ކެމެރާ ބޭނުންކުރުމުގެ މުހިންމުކަން އަދި އެކަމަށް ހުރި ގޮންޖެހުންތައް ދެނެގަތުމަށް މަސައްކަތްކުރެވުނު ކަމަށް ވެސް އެ ކޮމިޝަނުގެ އަހަރީ ރިޕޯޓުގައި ވަނީ ބުނެފައެވެ.

އޭގެ އިތުރުން، ޕޮލިސް ސްޓޭޝަންތަކާއި ޖަލުތަކުގައި ސީސީޓީވީ ކެމެރާ ޤާއިމުކުރެވިފައި ނެތްކަން ވެސް އެޗްއާރުސީއެމުން ވަނީ ފާހަގަކޮށްފައެވެ.

އެ ކޮމިޝަނުގެ ރިޕޯޓުގައި ބުނި ގޮތުގައި މިތަންތަނުގައި ކެމެރާ ނެތުމުން އެތަނުގައި ހިނގާ ކަންތައްތައް ދެނެގަތުމަށް އުނދަގޫވެ މައްސަލަތައް ތަހުޤީގު ކުރުމަށް ދަތިތަކާއި ކުރިމަތިލާންޖެހެއެވެ. އެ މައްސަލައަށް ހައްލެއް ހޯދުމަށް މަސައްކަތްކޮށް އިދާރާތަކުގެ އިސް ފަރާތުގެ ސަމާލުކަމަށް މިކަންތައް ގެނެވުނު ކަމަށް އެ ކޮމިޝަނުން ވަނީ ވިދާޅުވެފައެވެ.