ޚަރަދު ކުޑަކުރުމުގެ ވިސްނުމެއް ރައީސް މުހައްމަދު މުއިއްޒުގެ ކިބައިގައި ނެތް ކަމަށް ޕީޕަލްސް ނެޝަނަލް ފްރޮންޓު (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
ޚަރަދު ކުޑަކުރުމުގެ ނަމުގައި މައި ދެ އިންތިހާބު އެއްކޮށްލާ މަޖިލީހުގެ ދައުރު ކުޑަކުރަން ގާނޫނު އަސާސީއަށް އިސްލާހު ގެނައުމަށް ސަރުކާރުން ދަނީ މަސައްކަތްކުރަމުންނެވެ.
އެކަމަށް އިޝާރާތްކުރައްވާ މަލީހު އެކްސްގައި ކުރެއްވި ޕޯސްޓެއްގައި ވިދާޅުވީ، ދެ އިންތިހާބު އެއްކޮށްލުމަށް ވުރެ ޚަރަދު ކުޑަކުރުމުގެ ގޮތުން މިނިސްޓްރީތަކުގެ އަދަދު މަދުކުރުން މާ ރަގަޅު ކަމަށެވެ.
އެގޮތުން އެލްޖީއޭ މިނިސްޓްރީއެއް އޮންނަން ނުޖެހޭ ކަމަށާ ޅެން ފަރުވާ މިނިސްޓްރީއަކީ ބޭކާރު މިނިސްޓްރިއެއް ކަމަށާ ބުޅާ މިނިސްޓްރީއަކީ އިސްރާފެއް ކަމަށް ވިދާޅުވެ މަލީހު އިތުރަށް ވިދާޅުވީ، ޔޫތު އާ ސްޕޯޓްސްއަކީ ވަކި ދެ މިނިސްޓްރީއަކަށް ވާން ނުޖެހޭ ކަމަށާ އެންވަޔަރަމަންޓު މިނިސްޓްރީއެއް ވެސް އޮންނަން ނުޖެހޭ ކަމަށާ ހަޔަރ އެޑިއުކޭޝަން މިނިސްޓްރީ ވެސް ވަކިން އޮތުން ބޭކާރު ކަމަށެވެ.
މީގެ އިތުރުން ދައުލަތުގެ ކަންކަމަށް ބަލާއިރު ކަރަދު ކުޑަކުރުމުގެ ވިސްނުން ރައީސް މުއިއްޒުގެ ކިބައިގައި ނެތް ކަމަށް ވެސް މަލީހު ވަނީ ވިދާޅުވެފައެވެ.
