ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިހާބު އެއްކޮށްލުމާއެކު ގާނޫނުއަސާސީއަށް އެތައް ބަދަލެއް ގެންނަމުންދަނީ ރައީސް ޑރ. މުހައްމަދު މުއިއްޒުގެ މުށުތެރެއަށް ބާރުތައް ގެންނަންކަމަށް ވިދާޅުވެ ކުރީގެ ނައިބު ރައީސް ފައިސަލް ނަސީމް ފާޑުކިޔުން އަމާޒުކުރައްވައިފިއެވެ.

ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލައި، މިހާރު ހިނގަމުންދާ މަޖިލީހުގެ ދައުރު ކުރު ކުރުމަށް ގާނޫނުއަސާސީ ބަދަލުކުރުމަށް ސަރުކާރުގެ ފަރާތުން މަޖިލީހަށް ވަނީ ހުށަހަޅާފައެވެ.

މިކަމާމެދު ހިތްހަމަނުޖެހުން ފާޅުކުރައްވާ އެކްސްގައި ކުރެއްވި ޕޯސްޓެއްގައި ފައިސަލް ވިދާޅުވީ މިއީ އެހެން މަގުސަދެއްގައި ގެންނަ ބަދަލެއް ކަމަށެވެ.

މިދިޔަ ދެ އަހަރު ތެރޭ ގާނޫނުއަސާސީ އަށާއި މުހިންމު އެތައް ގާނޫނަކަށް ސަރުކާރުން ހުށަހަޅައިގެން ވެރިކަންކުރާ ޕީއެންސީގެ މެޖޯރިޓީ އޮތް މަޖިލީހުން ގެނައި ބަދަލުތަކުގެ މަގުސަދަކީ ބާރުތައް ޖަމާކުރުންކަމަށް ފައިސަލް ވިދާޅުވެފައިވެ އެވެ.

އަދި، ސަރުކާރުގެ އަމަލުތައް ބަހައްޓަން ވާނީ ގައުމަށާއި މުޅި ރައްޔިތުންގެ މަސްލަހަތަށް އިސްކަން ދީގެން ކަމަށާއި މި ސަރުކާރާއި މަޖިލީހުގެ އަމަލުތަކުގެ ސަބަބުން ރައްޔިތުންނަށް ވާނެ މޮޅެއް ނުފެންނަ ކަމަށް ވެސް ފައިސަލް ވަނީ ވިދާޅުވެފައެވެ.

ދެ އިންތިހާބު އެއްކޮށްލަނީ ހަރަދުކުޑަކުރަން ކަމަށް ވިދާޅުވާތީ، އެކަމަށް ރައްދު ދެއްވާ ފައިސަލް ވިދާޅުވީ ދައުލަތުގެ ހަރަދު ކުޑަކުރަން ބޭނުންވާނަމަ އެންމެ ފުރަތަމަ ކުރަންވި ކަމަކީ ބޭކާރު ހަރަދުތައް ހުއްޓާލުން ކަމަށެވެ.