އިންތިހާއަށް ކަންކަން ސިއްރު ކުރުން އެއީ މިސަރުކާރުގެ އެންމެ ކަމުނުދާ އެއްސިފަ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިއަދު ހެނދުނު ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަ ދައްކަވަމުންނެވެ.

ފައިސަލް ވިދާޅުވީ ކުރީ ސަރުކާރުގެ ކަންކަން ސިއްރު ކުރި ކަމަށް މިސަރުކާރުގެ ބޭފުޅުން ވާހަކަ ދެއްކެވި ނަމަވެސް މިސަރުކާރުގެ ސިއްރުކަން މާ ބޮޑު ކަމަށެވެ. މުޅި މަންޒަރު ފެނިގެންދަނީ ތަފާތުކޮށް ކަމަށް ފައިސަލް ވިދާޅުވިއެވެ.

ފައިސަލް ވިދާޅުވީ ގައުމުގެ ކަންކަމުގައި މިސަރުކާރުގެ ބޭފުޅުން ސީދާ އޮޅޭގޮތަށް ވާހަކަތައް ދައްކަވާ ކަމަށާއި، އެއީ ވަރަށް ގޯސް ކަމެއް ކަމަށެވެ.

ފައިސަލް ވިދާޅުވީ މިދިޔަ ފަސް އަހަރުގައި ނައިބު ރައީސްކަމުގެ މަގާމުގައި ހުންނަވައިގެން މަސައްކަތް ކުރީ ރައްޔިތުންނަކީ އެންމެ މުހިންމު މީހުން ކަމުގައި ވިސްނައިގެން ކަމަށެވެ. އަދި އިހްލާސްތެރިކަމާއި ތެދުވެރިކަމާއެކު، ގައުމާ ރައްޔިތުންނަށް ޚިދުމަތް ކުރެވިފައިވާ ކަމަށް ގަބޫލުކުރައްވާ ކަމަށް ފައިސަލް ވިދާޅުވި އެވެ.