"ރައްޔިތުންގެ މަޖިލީހޭ" ދަންނަވަން މިހާރު އެމަނިކުފާނަން އުނދަގޫ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.

އެމްޑީޕީން ރޭ ވިލިމާލޭގައި ބޭއްވި ކަންމަތީ ބައްދަލުވުމެއްގައި ފައިސަލް ވިދާޅުވީ ގާނޫނު އަސާސީ އަށް މިހާރު ގެންނަނީ އިސްލާހެއް ނޫން ކަމަށާއި އިސްލާހަކީ ކަމެއް އޮންނަ ގޮތަކަށް ވުރެ ރަނގަޅަށް ގެންނަ ބަދަލަކަށް ކިޔާ އެއްޗެއް ކަމަށެވެ. ނަމަވެސް މިހާރު ފެންނަނީ ރައްޔިތުންގެ މަޖިލީހުން ގާނޫނު އަސާސީ ގަޑުބަޑު ކުރާ މަންޒަރު ކަމަށްވެސް ފައިސަލް ވިދާޅުވި އެވެ.

އެތައް ބައެއްގެ ގުރުބާނީއާއި މިންނެތް މަސައްކަތުން ގެނައި ގާނޫނުއަސާސީ ބާބަކަށް ފަހު ބާބަކުން، މާއްދާއަކަށް ފަހު މާއްދާއަކުން ގެއްލިގެން ގޮސް 2004ގެ ކުރިން ރާއްޖޭގެ ހިންގުމުގެ ނިޒާމު އޮތް ގޮތަށް ފުރޮޅިގެންދާ މަންޒަރު ފެންނަ ކަމަށް އޭނާ ވިދާޅުވި އެވެ.

ފައިސަލް މިހެން ވިދާޅުވި އިރު މަޖިލީހުން ދާދިފަހުން ވަނީ ގާނޫނު އަސާސީ އަށް ކުއްލި އިސްލާހުތަކެއް ގެނެސްފަ އެވެ.

އޭގެތެރޭގައި ހިމެނެނީ ސަރުކާރުން ވަނީ ޕާޓީ ބަދަލުކުރުމުން މަޖިލިސް މެމްބަރުންގެ ގޮނޑި ގެއްލޭ އިސްލާހަކާއި، ރައްޔިތުންގެ މަޖިލީހުގެ ރުހުން ނެތި ރާއްޖޭގައި ބޭރު ސިފައިންނަށް ނުތިބެވޭ ގޮތް ހެދުމުގެ އިސްލާހެވެ. އަދި ރާއްޖޭގެ ސަރަހައްދަށް އެއްވެސް ބަދަލެއް ގެނެވޭނީ މަޖިލީހުގެ މެމްބަރުންގެ މަދުވެގެން ތިންބައިކުޅަ ދެބައިގެ އަޣުލަބިއްޔަތުން ކަމަށް ހެދުމުގެ އިސްލާހު ވަނީ ގާނޫނު އަސާސީ އަށް ގެނެސްފަ އެވެ.

މި އިސްލާހުގެ ސަބަބުން އިދިކޮޅު ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފަ އެވެ. އެގޮތުން މި ބަދަލަކީ ރައީސްގެ މުށުތެރެއަށް މެންބަރުން ލުން ކަމަށާއި މި ބަދަލުގެ ސަބަބުން މެމްބަރުންގެ ހިޔާލު ފާޅުކުރުމުގެ މިނިވަންކަމަށް ހުރަސްއެޅޭކަމަށް އިދިކޮޅުން ދަނީ ބުނަމުންނެވެ.

މި އިސްލާހު ބާތިލުކުރަން ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވަނީ މިދިޔަ މަހުގެ 24ވަނަ ދުވަހު ސުޕްރީމް ކޯޓަށް ހުށަހަޅުއްވާފަ އެވެ. މި މައްސަލައަށް އެމްޑީޕީއާއި ޑިމޮކްރެޓުން ވަނީ ތަދައްހުލު ވެފައެވެ.