މިދިޔަ ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން، އޭރުގެ ސެޓްލްމަންޓް ކޮމިޓީން ބަދަލުދޭން ނިންމާފައިވާ 10 ސެޓްލްމަންޓަކަށް އަމަލުކުރުން ބަންޑާރަ ނައިބުގެ އޮފީހުން ހުއްޓުވައިފިއެވެ.

ބަންޑަރ ނައިބު އަހުމަދު އުޝާމް އެކަން ހާމަކުރެއްވީ އެ އޮފީހުގެ ފުރަތަމަ 100 ދުވަހުގެ މަސައްކަތާ ގުޅިގެން މައުލޫމާތު ދޭން ބޭއްވި ނޫސްވެރިންގެ ބައްދަލުވުމެއްގައެވެ. އެގޮތުން ފިނޭންސް މިނިސްޓްރީ އާއި ޓޫރިޒަމް މިނިސްޓްރީއަށް އެއްބަސްވުންތަކާ ގުޅިގެން އެއްވެސް މުއާމަލާތެއް ނުކުރަން އަންގާފައިވާ ކަމަށް އޭނާ ވިދާޅުވިއެވެ.

އެ ކޮމިޓީން އެކި ފަރާތްތަކަށް ދީފައިހުރި ސެޓްލްމަންޓުގެ އަގު ކުރާކަމުގައި ވާނަމަ އެއް ބިލިއަން ރުފިޔާއަށްވުރެ ބޮޑު އަދަދެއް ހަރު މުދަލާއި ފައިސާގެ ގޮތުގައި ދައުލަތުން އެކިއެކި ފަރާތްތަކަށް ދީފައިހުރިކަން ފާހަގަކުރެވޭ ކަމަށް ވެސް އޭނާ ވިދާޅުވިއެވެ.

މި އެއްބަސްވުންތަކުގެ ތެރޭގައި ގިނައިން ހިމެނެނީ ޓޫރިޒަމްގެ ބޭނުމަށް ރަށްތައް ދޫކުރަން ވެފައިވާ އެއްބަސްވުންތައް ކަމަށް ވެސް އުޝާމް ވިދާޅުވިއެވެ.

މި 10 ފަރާތަށް ގެއްލުމުގެ ބަދަލުގެ ގޮތުގައި އެއް ބިލިއަން ރުފިޔާގެ ފައިސާ އަދި ހަރުމުދާ ދޭން އެއްބަސްވެފައިވާކަން ވެސް އުޝާމް ފާހަގަކުރެއްވިއެވެ.

"ޝަރީއަތުގަ ދައުލަތާ ދެކޮޅަށް ދައުވާކޮށްފަ ހުރި ފަރާތްތަކަށް، ވަރަށް ސާފުކޮށް ވިން ނުވާނެ ކަހަލަ މައްސަލަތައް ވެސް އެބަހުރި ސެޓްލްމެންޓް ކޮމެޓީން ސެޓްލް ކޮށްފަ. ބައެއް މައްސަލަތަކުގަ އެބަހުރި އޮޑިޓާ ޖެނެރަލްގެ އޮފީހުން ވަކިގޮތަކަށް އަމަލު ކުރުމަށް ލަފާދީފަ، ނުވަތަ ވަކި ސެޓްލްމެންޓަކަށް ދާކަމަށް ވަނީނަމަ ވަކި މިންވަރެއް އޮޑިޓާ ޖެނެރަލްގެ އޮފީހުން ކަނޑައަޅާފަ ހުރި މައްސަލަތަކުގަ އެއަށްވުރެ ބޮޑެތި އަދަދުތަކުން ސެޓްލްކޮށްފަ ހުރި މައްސަލަތައް ވެސް އެބަހުރި،" އުޝާމް ވިދާޅުވިއެވެ.

ގެއްލުމުގެ ބަދަލުގެ ގޮތުގައި މިދިޔަ އަހަރު ފަސް އަހަރު ތެރޭގައި ދެ ބިލިއަން ރުފިޔާއަށްވުރެ ގިނަ ފައިސާ ދޫކޮށްފައިވާ ކަމަށް ސަރުކާރުގެ ފިޒިކަލް ހާލަތުގެ ބަޔާނުގައި ބަޔާންކޮށްފައިވެއެވެ.