ކުރީގެ ކޮމިޝަނަރ ޖެނެރަލް އޮފް ކަސްޓަމްސް މުހައްމަދު ޖުނެއިދު، ރައީސް އަބްދުﷲ ޔާމީންގެ ޕާޓީ، ޕީޕަލްސް ނެޝަނަލް ފްރޮންޓަށް ސޮއިކުރައްވައިފިއެވެ.

ސިޔާސީ ކަންކަމާ ޒަމާންތަކެއް ދުރުގައި ހުންނެވުމަށް ފަހު ޖުނެއިދު ޕީއެންއެފާ ގުޅިވަޑައިގެންނެވީ ބުރާސްފަތި ދުވަހުގެރޭއެވެ. އޭނާ ވަނި އެރޭ ބޭއްވި ޕީއެންއެފްގެ ޓައުން ހޯލު ޖަލްސާގައި ޕީއެންއެފްއާ ރަސްމީކޮށް ގުޅިވަޑައިގެން ރައީސް ޔާމީންއާ ރަމްޒީ ގޮތުން ފޯމު ހަވާލުކުރައްވާފައެވެ.

ޖުނެއިދު ވިދާޅުވީ ގޮތުގައި އެނާ ޕީއެންއެފްއާ ގުޅިވަޑައިގަތީ ސިޔާސީ އެކި ފިކުރުތަކާ އެކު ކުރެވުނު މަސައްކަތުގެ ތަޖުރިބާގެ ތެރެއިން، ރައީސް ޔާމީން ފިޔަވާ ގައުމާ މެދު ވިސްނަވާ ވެރިއަކު ނެތްކަން ހާމަވުމުންނާ ރައީސް ޔާމީންގެ ގައުމީ ފިކުރަނީ މިއަދު ގައުމަށް އެންމެ ބޮޑަށް ބޭނުން ޖެހިފައިވާ ސިޔާސަތުކަމަށް ގަބޫލުކުރެވޭތީ ކަމަށެވެ.

ޖުނެއިދަކީ ދައުލަތުގެ އެކި މަގާމުތައް ވެސް އަދާކުރައްވާފައިވާ ސިޔާސީ މައިދާނަށް ފަރިތަ ބޭފުޅެކެވެ. އޭނާ ވަނީ އެމްޕީއެލްގެ ސީއީއޯ ކަމާ އަދި ކޮމިޝަނަރ ޖެނެރަލް އޮފް ކަސްޓަމްސްގެ މަޤާމުވެސް އަދާކުރައްވާފައެވެ. އޭނާ އަކީ މިވަގުތު ރާއްޖޭގެ މަޝްހޫރު ވިޔަފާރި ވެރިއެއްވެސް މެއެވެ.