އެމެރިކާއިން ދެމުންދާ އިންޒާރުތަކަށް ފަރުވާލެއް ނެތްކަން ހާމަކުރައްވައި، އީރާނުގެ ޕާލަމެންޓުގެ ރައީސް މުޙައްމަދު ބާގިރު ގާލިބާފް އެމެރިކާއަށާއި އިސްރާއީލަށް ވަރުގަދަ އިންޒާރެއް ދެއްވައިފިއެވެ.

އީރާނުގެ މަޖިލީހުގައި ވާހަކަދައްކަވަމުން ގާލިބާފް ވިދާޅުވީ، އީރާނުގެ އިސްތިގުލާލަށް އުނިކަން އަންނަ ފަދަ އެއްވެސް އަމަލެއް އެމެރިކާ ނުވަތަ އިސްރާއީލުން ހިންގައިފިނަމަ، އޭގެ ބަދަލު ވަރަށް ހިތިވާނެ ކަމަށެވެ.

އެގޮތުން އީރާނަށް ހަމަލާއެއް ލިބިއްޖެ ހާލަތެއްގައި، މެދުއިރުމަތީގައި ހުރި އެމެރިކާގެ ހުރިހާ އަސްކަރީ މަރުކަޒުތަކާއި، ކަނޑުގެ ސަރަހައްދުގައިވާ މަނަވަރުތަކުގެ އިތުރުން އިސްރާއީލުގެ ރަށްތަކަށް އަމާޒުކޮށް ވަރުގަދަ ހަމަލާތަކެއް ދޭނެ ކަމަށް އޭނާ ވިދާޅުވިއެވެ.

ގާލިބާފް އިތުރަށް ހާމަކުރެއްވި ގޮތުގައި، ދިފާއީ ގޮތުން ކުރަންޖެހޭ ކަންކަމުގައި އީރާނުން ފަހަތަކަށް ނުޖެހޭނެއެވެ. އަދި ދިފާއުގައި ދޭ "ޕްރީއެމްޕްޓިވް ސްޓްރައިކް" ނުވަތަ އިސްވެ ދޭ ހަމަލާތައް ދިނުމުގެ އިޚުތިޔާރު ވެސް އީރާނަށް އޮތް ކަމަށާއި، އެފަދަ ފިޔަވަޅެއް އެޅުމުގެ ފުރުސަތު ނައްތާނުލެވޭނެ ކަމަށް އޭނާ ވިދާޅުވިއެވެ.

އިރާނުން މިފަދައިން ބުނެފައިވަނީ މެދުއިރުމަތީގެ މަސްރަހު ނުތަނަވަސްވެ، އެމެރިކާއިން އީރާނަށް ފިއްތުންތައް ކުރިމަތިކުރަމުންދާ ދަނޑިވަޅެއްގައެވެ. އީރާނުން ބުނަމުންދަނީ އެގައުމުގެ އަސްކަރީ ގާބިލުކަން ހުރީ ކޮންމެ ފަދަ ހަމަލާއަކަށް ވެސް ރައްދުދީ، ގައުމުގެ ދިފާއުގައި ތެދުވުމަށް ތައްޔާރަށް ކަމަށެވެ.

އީރާނުގެ މި ވަރުގަދަ ރައްދާއެކު، ސަރަހައްދީ ބާރުތަކުގެ މެދުގައި އޮތް ނުތަނަވަސްކަން އިތުރަށް ބޮޑުވެ، ބައިނަލްއަގުވާމީ މުޖުތަމައުގެ ސަމާލުކަން މި މައްސަލައަށް ވަނީ ހުއްޓިފައެވެ.