ސަރުކާރުން އިސްލާމީ މަބްދައުތަކަށް އިސްކަން ނުދީ އެހެން މީހުންނަކީ ލާދީނީ މީހުންގެ ގޮތުގައި ތަޞްރީޙެއް ސަރުކާރުގެ އިސްވެރިޔާ ދިނުމަކީ ނިފާޤުކަން ކަމަށް ކުރީގެ އުއްތަމަ ފަނޑިޔާރު ޑރ އަހުމަދު އަބްދުﷲ ދިދީ ވިދާޅުވެއްޖެއެވެ.

ސަރުކާރާ އިދިކޮޅު ފަރާތްތަކަކީ "ދީނާ ހިލާފު ސިޔާސީ ފިކުރެއް" ގެ ގޮތުގައި ރައީސް މުހައްމަދު މުއިއްޒު ސިފަ ކުރައްވާފައިވުމަށް އިޝާރާތް ކުރައްވާ ޑރ އަހުމަދު އެކްސްގައި ކުރެއްވި ޕޯސްޓެއްގައި ވިދާޅުވީ، މިހާރުގެ ދިވެހި ސަރުކާރަކީ އިސްލާމީ ސިޔާސީ ފިކުރާއި، އިސްލާމީ ވެރިކަމުގެ ނިޒާމު އޭގެ މައްޗަށް ބިނާވެގެންވާ އެއްވެސް މަބްދައަކަށް ނުވަތަ އުޞޫލަކަށް ތަބާވާ ސަރުކާރެއް ނޫންކަން އެއްވެސް ޝައްކެއް ނެތް މިންވަރަށް އެނގެން އޮންތް ކަމަށެވެ.

އެހެންކަމުން އެފަދަ ހާލަތެއްގައި އެހެން މީހުންނަކީ "ލާދީނީ" ބައެއްގެ ގޮތުގައި ތަޞްރީޙެއް ސަރުކާރުގެ އިސްވެރިޔާ ދިނުމަކީ ނިފާޤުގެ ސިފައެއްކަން ޞައްފު ސޫރަތުގެ ދެވަނަ އާޔަތުން ތިން ވަނަ އާޔަތުގެ ތަފްސީރުން އެނގެން އޮންނަ ކަމަށް ވެސް ޑރ އަހުމަދު ޕޯސްޓުގައި ވިދާޅުވެފައިވެއެވެ.

ޑރ އަހުމަދު މިފަދައިން ވިދާޅުވެފައިވާއިރު ޞައްފު ސޫރަތުގެ އެ ދެއާޔަތުގެ ތަފްސީރުގައިވާ ގޮތުގައި އިންސާނުން އެބައިމީހުން ނުކުރާކަންކަމުގެ ވާހަކަ ނުދެއްކުމަށް ވެއެވެ. އަދި ނުކުރާ ކަންކަމުގެ ވާހަކަ ދެއްކުމުން ﷲގެ ހަޟްރަތުގައި އެބައިމީހުންގެ ނުރުއްސެވުން ބޮޑުވެގެން ދާނެތެވެ.