ފަލަސްތީނުގެ ބިމަށް ގަދަކަމުން ވެރިވެގަނެގެން އުޅޭ އިޒްރޭލަށް ހަތިޔާރު ވިއްކުން މަނާ ކުރުމަށް އ.ދ ގެ އާންމު މަޖިލީހުގައި ދިވެހިރާއްޖޭން ގޮވާލައިފިއެވެ.

ރާއްޖެ އިން މިފަދައިން ގޮވާލީ ފަލަސްތީނުގެ ޣައްޒާގެ ރައްޔިތުންނާ ދެކޮޅަށް އިސްރާއީލުން ކުރަމުންދާ ހަނގުރާމަ ވަގުތުން ހުއްޓާލައި ޣައްޒާ އަށް އިންސާނީ އެހީ ފޯރުކޮށްދިނުމާ ގުޅޭ ގޮތުން އދ. ގެ އާންމު މަޖިލީހުގައި ކުރިއަށްދިޔަ ބަހުސްގައެވެ. ރާއްޖޭގެ ފަރާތުން އެކަމަށް ވަކާލާތު ކުރެއްވީ ރާއްޖެ އިން އދ. އަށް ކަނޑައަޅުއްވާފައި ހުންނަވާ ސަފީރު ޑރ. އަލީ ނަސީރު މުހައްމަދެވެ.

ރާއްޖޭގެ ފަރާތުން ވާހަކަ ދައްކަވަމުން ނަސީރު ވިދާޅުވީ އ.ދ ގެ ސަލާމަތީ މަޖިލީހުގައި ވީޓޯ ބޭނުން ކުރުމުގެ ސަބަބުން އިޒްރޭލުން ހިންގާ އަމަލުތައް ކުރިއަށް ގެންދިޔުމަށް އިތުރު ހިތްވަރެއް ލިބުނު ކަމަށެވެ. އެގޮތުން މިދިޔަ މަހު 29، ގައި ފަލަސްތީނުގެ ރައްޔިތުންނަށް އެހީ ހިފައިގެންދިޔަ އުޅަނދުތަކެއް ކައިރިއަށް ދިން ހަމަލާ އޭނާ ފާހަގަ ކުރެއްވިއެވެ.

އޭގެއިތުރުން އެދުވަހުގެ ހަމަލާގައި އެކަނިވެސް ފަލަސްތީނުގެ ސަތޭކައަށްވުރެ ގިނަ ރައްޔިތުން ޝަހީދުކޮށްލައި ޒަހަމުކޮށްލާފައިވާ ކަމަށާއި ފަލަސްތީނުގެ ރައްޔިތުން ފެނާއި ކާބޯތަކެތީގެ އިތުރުން އަސާސީ ބޭނުންތަކުން ވެސް މަރުހޫމު ކުރުމަށްފަހު އިޒްރޭލުން އެމީހުން މަރަމުން ގެންދިޔުމަކީ މުޅި ދުނިޔެ ވެސް އެކަމާ ލަދު ގަންނަން ޖެހޭ ކަމެއް ކަމަށް ނަސީރު ވިދާޅުވިއެވެ.

ނަސީރު ވަނީ އިސްރާއީލުން ފަލަސްތީނުގެ ކުށެއް ނެތް ރައްޔިތުންނާ ދެކޮޅަށް ހިންގަމުން ގެންދާ ލާއިންސާނީ އަމަލުތައް ހުއްޓުވުމަށް އަވަސް ފިޔަވަޅުތަކެއް އެޅުމަށް ގޮވާލައްވައިފައެވެ. އަދި އިޒްރޭލުން ފަލަސްތީނުގެ ރައްޔިތުންނަށް ދެމުންދާ ހަމަލާތައް ވަގުތުން ހުއްޓުވައި ޖަވާބުދާރީ ކުރުމަށް ބައިނަލްއަގުވާމީ މުޖުތަމައަށް ނަސީރު ގޮވައިލެއްވިއެވެ.

އިސްރާއީލުން ފަލަސްތީނުގެ ޣައްޒާ އަށް ހަމަލާތައް ދޭން ފެށީ މިދިޔަ އޮކްޓޯބަރު 7 އިން ފެށިގެންނެވެ. އެ ހަމަލާތަކުގައި ފަލަސްތީނުގެ 30،000 އަށް ވުރެ ގިނަ މީހުން ޝަހީދުކޮށްލައި، 70،000 އަށް ވުރެ ގިނަ މީހުން ވަނީ ޒަހަމްކޮށްލައިފައެވެ.