ކުޅުދުއްފުށީ ރީޖަނަލް ހޮސްޕިޓަލުގެ 2021 އަދި 2022 ވަނަ އަހަރުގެ މާލީ މުއާމަލާތްތަކާ ގުޅޭގޮތުން އޮޑިޓާ ޖެނެރަލްގެ އޮފީހުން ނެރުނު ކޮމްޕްލަޔަންސް އޮޑިޓް ރިޕޯޓުގައި، ދައުލަތުގެ މާލިއްޔަތު ގަވާއިދާ ހިލާފަށް ހިންގާފައިވާ ބޮޑެތި އިހުމާލުތަކެއް ފަޅާއަރުވާލައިފިއެވެ.

މި މަހުގެ 14 ވަނަ ދުވަހު އޮޑިޓާ ޖެނެރަލްގެ އޮފީހުން އާންމުކުރި މި ރިޕޯޓަކީ އެ ހޮސްޕިޓަލުގެ ދެ އަހަރު ދުވަހުގެ މާލީ މުއާމަލާތްތައް ދިރާސާކުރުމަށްފަހު ތައްޔާރުކޮށްފައިވާ ރިޕޯޓެކެވެ. މި ރިޕޯޓުގައިވާ ގޮތުން، ހޮސްޕިޓަލުގެ ހިންގުމުގައި މާލިއްޔަތު ގަވާއިދާ އިންތިހާއަށް ހިލާފުވެ، ދައުލަތުގެ ފައިސާ ބޭނުންކުރުމުގައި ބޮޑެތި އިހުމާލުތަކެއް ވަނީ ވެފައެވެ.

އޮޑިޓް ރިޕޯޓުން ފާހަގަވެފައިވާ ބައެއް މުހިންމު ކަންތައްތަކުގެ ތެރޭގައި، މުދަލާއި ޚިދުމަތް ހޯދުމުގައި އަމަލުކުރަންޖެހޭ އުސޫލުތަކާ ހިލާފަށް އަމަލުކުރުމާއި، އެކަށީގެންވާ ލިޔެކިޔުން ނެތި ބޮޑެތި އަދަދުތަކުން ފައިސާގެ މުއާމަލާތްތައް ހިންގާފައިވުން ހިމެނެއެވެ. މީގެ އިތުރުން، ބައެއް މަޝްރޫޢުތަކާއި ޚިދުމަތްތަކަށް ފައިސާ ދެއްކުމުގައި މާލިއްޔަތު ގަވާއިދުގެ ތެރެއިން ފުރިހަމަކުރަންޖެހޭ މަރުހަލާތައް ފުރިހަމަކޮށްފައި ނުވާކަންވެސް ރިޕޯޓުގައި ވަނީ ފާހަގަކޮށްފައެވެ.

އެ ރިޕޯޓުގައި ފާހަގަކޮށްފައިވާ މައިގަނޑު މައްސަލަތަކުގެ ތެރޭގައި:

• ފޮޅާ ސާފުކުރުމުގެ މަސައްކަތުގައި 4.3 މިލިއަން ރުފިޔާގެ އިހުމާލު

• ޖޫރިމަނާ ފައިސާ ނުނަގައި ހަތަރު ލައްކައަށްވުރެ ގިނަ ރުފިޔާ ދޫކޮށްލުން

• އެޑްވާންސް ފައިސާ އަނބުރާ ނުހޯދުން

• ކްރެޑިޓް ހިދުމަތްތަކަށް ބިލް ނުކުރުމާއި ރެކޯޑުތައް ގެއްލުން

• ޕްރޮކިއުމަންޓް އުސޫލުތަކާ ހިލާފުވުން

• މުސާރައާއި އެލަވަންސްތަކުގެ މައްސަލަ

މި އިހުމާލުތަކަކީ ދައުލަތުގެ މާލީ ނިޒާމަށް އޮތް ބޮޑު ގޮންޖެހުމެއްގެ ގޮތުގައި އޮޑިޓް އޮފީހުން ސިފަކޮށްފައިވެއެވެ. އަދި މިފަދަ ކަންކަން ތަކުރާރުވިޔަ ނުދިނުމަށާއި، ޒިންމާވާންޖެހޭ ފަރާތްތަކާމެދު ފިޔަވަޅު އެޅުމަށްވެސް ރިޕޯޓުގައި ވަނީ އިރުޝާދު ދީފައެވެ.

މި މައްސަލައާ ގުޅިގެން ކަމާބެހޭ އިދާރާތަކުން އިތުރު ތަހުގީގުތައް ހިންގާނެ ކަމަށް ބެލެވެއެވެ.