ކެނެޑާގައި ހިންގާ ބައެއް ނުރައްކާތެރި ޖަރީމާތަކުގެ ފަހަތުގައި އިންޑިއާގެ މަޝްހޫރު "ބިޝްނޯއީ ގޭންގާއި" އެ ގައުމުގެ ސަރުކާރުގެ އެޖެންޓުންގެ މެދުގައި ވަރުގަދަ ގުޅުމެއް އޮތް ކަމަށް ކެނެޑާގެ އިންޓެލިޖެންސް އިދާރާތަކުން ހާމަކޮށްފިއެވެ.
ރޯޔަލް ކެނޭޑިއަން މައުންޓެޑް ޕޮލިސް (އާރް.ސީ.އެމް.ޕީ) އިން ނެރުނު ތަފްސީލީ ރިޕޯޓެއްގައި ބުނެފައިވަނީ، ކެނެޑާގައި ދިރިއުޅޭ ސިކުންގެ ވަކިވެގަތުމަށް މަސައްކަތްކުރާ ފަރާތްތަކަށް އަމާޒުކޮށް ހިންގާ ބިރުދެއްކުމާއި، ހަމަލާދިނުމުގެ އަމަލުތަކުގައި އިންޑިއާ ސަރުކާރުގެ އެޖެންޓުން ބިޝްނޯއީ ގޭންގުގެ އެހީތެރިކަން ހޯދަމުންދާ ކަމަށެވެ. މިއީ ބޭރު ގައުމެއްގެ ސަރުކާރަކުން ކެނެޑާގެ ސަލާމަތަށް ނުރައްކާވާ ފަދަ ގޮތަކަށް އަމަލުކުރާ ކަމަށް ބުނެ ނެރުނު ސީރިއަސް ތުހުމަތެކެވެ.
މި ރިޕޯޓުގައި ފާހަގަކޮށްފައިވާ ގޮތުގައި، އިންޑިއާގެ ޖަލެއްގައި ހުރި ނަމަވެސް ލޯރެންސް ބިޝްނޯއީގެ ގޭންގުން ދަނީ އިންޑިއާ ސަރުކާރުގެ ބައެއް އިސް ފަރާތްތަކާ ގުޅިގެން ކެނެޑާގައި ހަރަކާތްތެރިވާ "ޚާލިސްތާން" ހަރަކާތުގެ މީހުންނަށް އަމާޒުކޮށް ރޭވުންތައް ރާވަމުންނެވެ.
މިކަމުގެ ސަބަބުން ކެނެޑާގައި ދިރިއުޅޭ އާންމުންގެ ސަލާމަތަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް ކެނެޑާގެ ކަމާބެހޭ އިދާރާތަކުން ބުނެއެވެ.
މި ހާމަކުރުންތަކާ ގުޅިގެން އިންޑިއާ އާއި ކެނެޑާގެ ދެމެދުގައި އޮތް ހާރިޖީ ގުޅުން ވަނީ ގޯސްވެފައެވެ. ކެނެޑާގެ ބޮޑުވަޒީރު ޖަސްޓިން ޓްރޫޑޯ ވިދާޅުވެފައިވަނީ، އެ ގައުމުގެ އިސްތިގުލާލަށް އަރައިގަތުމުގެ ފުރުސަތު އެއްވެސް ބަޔަކަށް ނުދެއްވާނެ ކަމަށެވެ. ނަމަވެސް، އިންޑިއާ ސަރުކާރުން ވަނީ މި ތުހުމަތުތައް ދޮގުކޮށް، މިއީ އެއްވެސް އަސާސެއް ނެތް ވާހަކަތަކެއް ކަމަށް ބުނެފައެވެ.
