ޚިޔާލު ފާޅުކުރުމުގެ މިނިވަންކަމަކީ އަސާސީ ހައްގެއް ކަމަށާއި، އެ ހައްގަށް ހުރަސްއަޅާ ފަރާތްތަކަށް ރައްޔިތުން މާފު ނުކުރާނެ ކަމަށް ވިދާޅުވެ ޕީއެންއެފްގެ ސެކްރަޓަރީ ޖެނެރަލް މުޙައްމަދު މަލީހް ޖަމާލް ސަރުކާރަށް ވަރުގަދަ ފާޑުކިޔުމެއް އަމާޒުކުރައްވައިފިއެވެ.

މަލީހް މިހެން ވިދާޅުވީ، ސޯޝަލް މީޑިއާ ކޮންޓްރޯލް ކުރުމުގެ މަސައްކަތް މީޑިއާ އެންޑް ބްރޯޑްކާސްޓިންގ ކޮމިޝަނުން ފަށާފައިވާ ކަމަށް ބުނެ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ކަންބޮޑުވުން ފާޅުކުރުމާ ގުޅިގެން، އެ ޖަމިއްޔާގެ ވާހަކަތަކަށް ތާއީދުކުރައްވައި އެކްސްގައި ކުރެއްވި ޕޯސްޓެއްގައެވެ.

މި މައްސަލަ ބޮޑުވެފައިވަނީ "އަދަދު" ނޫހުން އާންމުކުރި ކާޓޫން ފޮޓޯއަކާއި ގުޅިގެން، އެ ނޫހަށް ފިޔަވަޅު އެޅުމަށް ކޮމިޝަނުން މަސައްކަތް ފެށުމުންނެވެ. މިއީ ނޫސްވެރިކަމުގެ މިނިވަންކަމަށް އަރައިގަތުން ކަމަށް ބުނެ ގިނަ ބައެއްގެ ފާޑުކިޔުން މިހާރު ވަނީ ކޮމިޝަނަށާއި ސަރުކާރަށް އަމާޒުވެފައެވެ. މަލީހް ވަނީ މިފަދަ އަމަލުތައް ވަގުތުން ހުއްޓާލުމަށް ގޮވާލައްވާފައެވެ.

މީގެ އިތުރުން، ދާދިފަހުން ސަރުކާރުން ވަނީ މީޑިއާތައް ކޮންޓްރޯލް ކުރުމަށް މަގުފަހިވާ ގޮތަށް އެކުލަވާލާފައިވާ މީޑިއާ އެންޑް ބްރޯޑްކާސްޓިންގ ކޮމިޝަންގެ ބިލު ތަސްދީގުކޮށްފައެވެ. މި ބިލުގެ ދަށުން މީޑިއާތައް ރެގިއުލޭޓް ކުރުމުގެ ބާރު ސަރުކާރުގެ ނުފޫޒު އޮންނަ ކޮމިޝަނަކަށް ލިބިގެންދާތީ، ނޫސްވެރިންނާއި އާންމުން ދަނީ ކަންބޮޑުވުން ފާޅުކުރަމުންނެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން މީޑިއާގެ މިނިވަންކަން ހަނިކުރަން މަސައްކަތް ކުރާ ކަމަށް ގިނަ ފަރާތްތަކުން ތުހުމަތު ކުރަމުންދާއިރު، މި ފިޔަވަޅުތަކުގެ ސަބަބުން ޑިމޮކްރަސީގެ ހަތަރުވަނަ ބާރަށް އޮތް ފުރުސަތުތައް ހަނިވެގެންދާނެ ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.