އޭޕްރިލްމަހު ބާއްވާ ލޯކަލް ކައުންސިލް އިންތިހާބަށް ކުރިމަތިލާން މިހާތަނަށް 1،000 އަށް ވުރެ ގިނަ މީހުން ފޯމް ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.

އީސީއިން ހާމަކުރި ގޮތުގައި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އިންތިހާބުގައި ވާދަކުރުމަށް އިއްޔެގެ ނިޔަލަށް ހުށަހެޅި ޖުމްލަ 1,324 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވެއެވެ.

އެގޮތުން އީސީގެ ތަފާސް ހިސާބުތަކުގައިވާ ގޮތުން ރަށު ކައުންސިލްތަކާއި ސިޓީކައުންސިލްތަކަށް ކުރިމަތިލާން މިހާތަނަށް 1،010 ފަރާތަކުން ފޯމު ހުށަހަޅާފައިވެއެވެ. އޭގެ ތެރެއިން ޝަރުތު ހަމަވާ ފޯމް ހުށަހެޅީ 750 ފަރާތަކުންނެވެ. އަނެއް 260 ފަރާތުގެ ތެރެއިން 77 ފަރާތަކުން، ޝަރުތު ހަމަނުވާތީ އަލުން ފޯމު ހުށަހަޅާފައިވާ ކަމަށް ވެސް އީސީން ބުނެފައިވެސް ވެއެވެ.

ލޯކަލް ކައުންސިލް އިންތިހާބުގައި ވާދަކުރުމަށް ސިޔާސީ ޕާޓީތަކުން ހުށަހެޅި 617 ކެންޑިޑޭޓުންގެ ކެންޑިޑަންސީ ގަބޫލުކުރިއިރު، 113 ކެންޑިޑޭޓުންގެ ކެންޑިޑަންސީ ގަބޫލުކޮށްފައެއް ނުވެ އެވެ. ކެންޑިޑަންސީ ގަބޫލުނުކުރުމުގެ ސަބަބުން ސިޔާސީ ޕާޓީތަކުން އަލުން 36 ކެންޑިޑޭޓުންގެ ފޯމު ހުށަހަޅާފައިވެއެވެ.

މީގެއިތުރުން ލޯކަލް ކައުންސިލް އިންތިހާބުގައި އަމިއްލަ ގޮތުން ވާދަކުރާ 133 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާއިރު، 70 ކެންޑިޑޭޓުންގެ ކެންޑިޑަންސީ ގަބޫލުކޮށްފައެއް ނުވެ އެވެ. އަމިއްލަ ގޮތުން ވާދަކުރާ 36 ކެންޑިޑޭޓެއްގެ ކެންޑިޑަންސީ ގަބޫލުނުކުރުމުން އަލުން ފޯމު ހުށަހަޅާފައިވެއެވެ.

ޑަބްލިއުޑީސީގައި ވާދަކުރުމަށް ހުށަހެޅި 574 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާއިރު، 126 ކެންޑިޑޭޓުންގެ ކެންޑިޑަންސީ ގަބޫލުކޮށްފައެއް ނުވެ އެވެ. މިގޮތުން ކެންޑިޑަންސީ ގަބޫލުނުކުރާ 34 ކެންޑިޑޭޓަކު އަލުން ފޯމު ހުށަހަޅާފައިވެއެވެ.

ސިޔާސީ ޕާޓީތަކުން ޑަބްލިއުޑީސީއަށް ވާދަކުރާ 488 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާއިރު، 77 ކެންޑިޑޭޓުންގެ ކެންޑިޑަންސީ ގަބޫލuކޮށްފައެއް ނުވެ އެވެ. މިގޮތުން އޭގެ ތެރެއިން 15 ކެންޑިޑޭޓަކު ވަނީ އަލުން އިލެކްޝަނަށް ފޯމު ހުށަހަޅާފައެވެ.

މީގެއިތުރުން އަމިއްލަ ގޮތުން ޑަބްލިއުޑީސީއަށް ވާދަކުރާ 86 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާއިރު، 49 ކެންޑިޑޭޓުންގެ ކެންޑިޑަންސީ ގަބޫލުކޮށްފައެއް ނުވެ އެވެ. ކެންޑިޑަންސީ ގަބޫލުނުކުރާ 19 ކެންޑިޑޭޓަކު ވަނީ އަލުން އިލެކްޝަނަށް ފޯމު ހުށަހަޅާފައެވެ.

ލޯކަލް ކައުންސިލްތަކަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ކުރިމަތިލާން އީސީން ހުޅުވާލީ މިމަހުގެ 17 ވަނަ ދުވަހު އެވެ. އިންތިހާބުގައި ވާދަކުރަން ފޯމު ހުށަހެޅުމުގެ ސުންގަޑިއަކީ އަންނަ އާދީއްތަ ދުވަހުގެ 3:00 އެވެ.