ކުރިއަށް އޮތް އިންތިޚާބުގެ ވޯޓާސް ލިސްޓުގައި ސޮއިކުރުމުގެ މަސައްކަތް އިލެކްޝަންސް ކޮމިޝަން (އީސީ) އިން މެދުކަނޑާލައިފިއެވެ.
ލިސްޓުގައޮ ސޮއިކުރުން މެދުކަނޑާލައިފަނީ ބުދަ ދުވަހުގެ ރޭ އިންތިޚާބާބޭހޭ މަރުކަޒު އާ އިންވެގެން ހުރި ގުދަނެއްގައި ހިނގި އަލިފާނުގެ ހާދިސާއާ ގުޅިގެންކަމަށެވެއެވެ.
އިލެކްޝަންސް ކޮމިޝަނުން ބުނީ މި ހާދިސާ ހިނގާފައިވަނީ އިންތިޚާބާބޭހޭ މަރުކަޒާ ވަރަށް ކައިރީގައި ހުރި ގުދަނެއްގައި ކަމަށެވެ.
ސޮއިކުރުން ހުއްޓާލީ ރައްކާތެރިކަމުގެ ފިޔަވަޅެއްގެ ގޮތުން، ވޯޓު ދިނުމުގެ ހައްގު ލިބިގެންވާ މީހުންގެ ފައިނަލް ރަޖިސްޓަރީގައި ކެންޑިޑޭޓުންގެ ފަރާތުން ސޮއިކުރުމުގެ މަސައްކަތް މިވަގުތަށް ހުއްޓާލާފައިވާ ކަމަށް އީސީން ބުނެފައިވެއެވެ.
އީސީން ބުނި ގޮތުގައި، އަލިފާނުގެ ހާދިސާ ހިނގި ސަރަހައްދުގައި ހުރި އިންތިޚާބާބޭހޭ މަރުކަޒުގެ މުހިންމު ތަކެތި ރައްކާތެރިކުރުމުގެ މަސައްކަތް ކުރަމުންދާ ކަމަށާ އެގޮތުން އެ މަރުކަޒުގައި ހުރި ތަކެތި އެތަނުން ނެރެ، ކައިރީގައި ހުރި ތޮއިބާ މިސްކިތަށް ބަދަލުކުރުމުގެ މަސައްކަތް ކޮމިޝަނުގެ މުވައްޒަފުން ދަނީ ކުރަމުންކަމަށް ވެސް އީސީއިން ބުނެފައިވެއެވެ.
ލިސްޓުގައި ސޮއިކުރުމުގެ މަސައްކަތް އަލުން ފަށާނެ ތާރީޚެއް ފަހުން އިއުލާނު ކުރާނެ ކަމަށް އިލެކްޝަންސް ކޮމިޝަނުން މައުލޫމާތު ދީފައިވެއެވެ.
