އިންޑިއާ އައުޓުގެ އަހުދު ނަގާލި ރައީސް ޑރ މުހައްމަދު މުއިއްޒު، ގައުުގެ ހައްގުގައި ޖިހާދުވީ ބަޠަލުންގެ ގުރުބާނީއަށް އިހާނާތްތެރިވެއްޖެ ކަމަށް ކުރީގެ ނައިބު ރައީސް، އަދި ޕީއެންއެފްގެ ނައިބު ރައީސް، ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

އެކްސްގައި ކުރެއްވި މާނަފުން ޕޯސްޓެއްގައި ޑރ ޖަމީލު ވަނީ ޝަހީދުންގެ މަތިވެރިކަން ގުރުއާނުން ސާބިތުކޮށްދީ އެއީ މާތްވެގެންވާ ބައެއްކަން ހަނދާން އައުކޮށްދެއްވާފައެވެ.

އެގޮތުން އާލް އިމްރާން ސޫރަތުގެ 169 ވަނަ އާޔަތުގެ މާނަ ނަކަލް ކުރައްވާ ޑރ ޖަމީލު ވަނީ، ، اللَّهގެ މަގުގައި ހަނގުރާމަކޮށް شهيد ވީ މީހުންނަކީ، މަރުވެފައިވާ ބަޔެކޭ ހީނުކުރުމަށާ އަދި، އެއީ އެބައިމީހުންގެ ވެރިރަސްކަލާނގެ حضرة ގައި رزق ލިބޭ حال، ދިރިތިބި ބައެއްކަން ހަނދާނަށް ގެންނަވާފައެވެ.

އެމަނިކުފާނު ވިދާޅުވީ އެފަދަ މަތިވެރިބަޔަކަށް ޝަހީދުންވާއިރު، މި ގައުމުގައި މިއަދު ޝަހީދުންގެ އަގު ވަޒަން ކުރަން ނޭނގިގެން އުޅޭ މަންޒަރު ފެންނަމުންދާ ކަމަށާ އެގޮތުން ޝަހީދުންނާ މަތިވެރި ޖިހާދުތަކުގެ އަބްތާލުންގެ ގުރުބާނީ ސިޔާސީ ބޭނުމަށް ވަކި ބަޔަކު ބޭނުންކުރަމުންދާ ކަމަށެވެ.

ޑރ ޖަމީލު ވަނީ ވެރިކަން ކުރާ ޕީއެންއެސީއިން ނޮވެމްބަރު 3ގެ އުދުވާނީ ހަމަލާއިން ރާއްޖެ ދިފާއުކުރުމަށް ނުކުތް އެއް ބަތަލު، ރިޓާޔާޑް ޖެނެރަލް މޫސާ އަލީ ޖަލީލު މާލޭގެ މޭޔަރު ކަމަށް ނެރެ އެ ކެމްޕެއިންގައި އިރުއިރުކޮޅާ ނޮވެމްބަރު 3 ގެ ހަމަލާގެ ވާހަކަ ދައްކާ ރައްޔިތުން ޖަޒަބާތީ ގޮތުން ބްލެކްމެއިލްކުރަމުންދާ ދިއުމަށް އިޝާރާތްކުރައްވާފައެވެ.

އެމަނިކުފާނު ވަނީ، ގައުމާއި މިނިވަންކަމުގައި ނަފުސު ގުރުބާންކޮށްލީ، ފަހުން އަންނަ ވެރިޔަކު ނުވަތަ ޖެނެރަލަކު ވިޔަސް އެޝަހީދުންގެ ނަމުގައި ސިޔާސީ މަންފާ ނަގާކަށް ނޫން ކަމަށް ވިދާޅުވެފައެވެ. އަދި އަމުދުން އިންޑިޔާ އައުޓް ގޮވަމުން ވެރިކަން ލިބުމުން މުޅި އެއަޙްދު ނަގާލި ރައީސް މުހައްމަދު މުއިއްޒު މިހާރު ނޮވެމްބަރު ތިނެއްގައި ގައުމު ސަލާމަތްކުރުމުގައި ހިއްސާވާ ޖެނެރަލަކު މޭޔަރުކަމަށް ނެގެން އެ ހިންގަވާ އަމަލު ވެގެންދާނީ 3 ނޮވެމްބަރުގެ ޝަހީދުން ގައުމުގެ އިސްތިގްލާލަށްޓަކައި ވިގުރުބާނީއަށް އިހާނާތްތެރި ވުމުގެ ގޮތުގައިވެސް ޑރ ޖަމީލު ވަނީ ސިފަކުރައްވާފައެވެ.

ޑރ ޖަމީލު މިފަދައިން ވިދާޅުވެފައިވަނީ ބެލެވޭ ގޮތުގައި ނޮވެމްބަރު 3 1988ގައި ރާއްޖެއަށް ކުރިމަތިވި އުދުވާނީ ހަމަލާގައި ގައުމު ސަލާމަތްކޮށްދިން ބަތަލެއްކަމަށްވާ ރިޓަޔާޑް ޖެނެރަލް މޫސާ އަލީ ޖަލީލު މާލޭގެ މޭޔަރު ކަމަށް ޕީއެންސީ ޓިކެޓުގައި ނެރެ އެދުވަހު އެމަނިކުފާނުގެ ގުރުބާނީގެ ނާޖާއިޒް ފައިދާ ނަގާ ސިޔާސީ މަންފާއެއް ހާސިލްކުރުމަށް ޕީއެންސީއިން ކުރަމުންދާ މަސައްކަތަށް ފަރސްޓު ލޭޑީވެސް ބާރުދެމުންދާތީ އެވެ.