ބިންވެރިޔާ ސްކީމުން ލިބޭ ގޯތި އެގްރީމަންޓުގައި ސޮއިކުރުމަށްފަހު، ދޫކޮށްލާން އެއްބަސްވި ގޯތީގެ ރަޖިސްޓްރީއަށް ބަދަލު އަންނަ އެއްވެސް މުއާމަލާތެއް ހިންގައިފިނަމަ އެގްރީމަންޓް ބާތިލުވާނެކަމަށް ހައުސިން މިނިސްޓްރީން ހާމަކޮށްފިއެވެ.

ޖެނުއަރީ 28 ވަނަ ދުވަހު، ހައުސިން މިނިސްޓްރީން މާލެ ސިޓީ ކައުންސިލަށް ފޮނުވި ސިޓީއެއްގައި ބުނެފައިވާ ގޮތުގައި ބިންވެރިޔާ ސްކީމުން ގޯތި ލިބިފައިވާ އެއްވެސް މީހަކު ދޫކޮށްލަންޖެހޭ ޖެހޭ ބިމުގެ ރަޖިސްޓްރީ އަމިއްލަކުރުން، ވިއްކާލުން ނުވަތަ ހިބައިން ދިނުންފަދަ އެއްވެސް މުއާމަލާތެއް ހިންގައިފިނަމަ ބިންވެރިޔާ ސްކީމަށް އެމީހަކު ޝަރުތުހަނުވާކަމަށް ނިންމައި ގޯތި އެއްބަސްވުން ބާތިލުކުރާނެ ކަމަށެވެ.

އެފަދަ މުއާމަލާތެއް ކުރުމަށް ބިންވެރިޔާ ސްކީމުން ގޯތި ލިބުނު މީހަކު ސިޓީ ކައުންސިލަށް ހުށަހަޅައިފި ނަމަ އެމުއާމަލާތް ހުއްޓުވުމަށް މިނިސްޓްރީން ވަނީ ސިޓީ ކައުންސިލަށް އަންގާފައެެވެ.

ބިންވެރިޔާ ސްކީމުގެ ދަށުން ގޯތި ލިބޭ ޝަރުތުތަތަކުގެ ތެރޭގައި މާލެ ސަރަހައްދުގައި އެމީހެއްގެ އަމިއްލަ ނަމުގައި 600 އަކަފޫޓަށްވުރެ ކުޑަ ބިންކޮޅެެއް އޮތްނަމަ އެ ދޫކޮށްލަންޖެހެ އެވެ. އަދި މާލެ ސަރަހައްދުގައި އަމިއްލަ ނަމުގައި އޮތް ގޯއްޗެއް އެހެން މީހަކަށް ދީފައި ނުވަތަ ވިއްކާލާފައިވާ މީހަކަށް ވެގެންނުވާނެ ކަމަށް އޮވެއެވެ.

އެ ސްކީމުން ޝަރުތު ހަމަވެ ގޯތި ލިބުނު ފަރާތްތަކާއެކު އެގްރީމަންޓުގައި ސޮއިކޮށް, ގިނަ ބަޔަކަށް މިހާރު ވަނީ ރަޖިސްޓްރީވެސް ހަވާލުކޮށްފައެވެ.