ކޮންމެ އަހަރެއްގެ މާރިޗް މަހުގެ އަށްވަނަ ދުވަސް ޚާއްސަވެގެންދަނީ ކަނބަލުންނަށެވެ. ބައިނަލް އަޤުވަމީ ގޮތުން އަންހެނުންނަށް ޚާއްސަކޮށް ފާހަގަކުރާ މިދުވަސް މި ރާއްޖޭގައި ދަނީ ވަރަށް ކުލަގަދަކޮށް ފަހަގަކުރަމުން. މުޖުތަމައުގައި، ސިޔާސީގޮތުންނާއި، އިޤުތިސާދީގޮތުންނާއި، އިޖުތިމާއީ ގޮތުން އަންހެނުންގެ ދައުރު ފާހަގަކޮށް އެކަމަށް ބާރު އެޅުމުގެ ގޮތުން ކަނބަލުންގެ ދުވަސް ފަހަގަކުރަމުން ދާއިރުގައި އަދު މި ދިވެހި މުޖުތަމައުގައިވެސް ދަނީ އަންހެނުންނަށް އޮންނަ ފުރުސަތުތައް އަދިވެސް އިތުރުވާން ޖެހޭ ކަމަށް އަމިއްލަ ޟަމީރަށް ގަބޫލުކުރެެވެއެވެ.

މިއަހަރުގެ ރިޔާސީ އިންތިޚާބަށް ސަފު އަތުރާލިއިރު 8 ކެންޑިޑޭޓުން ތިއްބެވެ. ގާތްގަނޑަކަށް އެންމެންހެން ދެއްކީ އެއް ވާހަކަތަކެކެވެ. މިނިވަންކަމާއި ސިޔާދަތާއި ތަރައްގީއެވެ. ޒުވާނުންނާއި އަންހެނުންނަށް އޮތް ފުރުސަތުތައް ފުޅާކުރުމެވެ.

މިއީ ކޮންމެ އިންތިހާބާ ދިމާކޮށް ވެސް ނިކަން ފާޓޫ ފުޅާކޮށް ދައްކާ ވާހަކައެކެވެ. ވަކި ކުލައެއް ވަކި ސިޔާސީ ޕާޓީއެއް ވަކި ދާއިރާއެއް މިކަމުގައި އިސްތިސްނިސް ނުވެއޭ ބުނެވިދާނެއެވެ.

އެގޮތުން ބަލާއިރު، ރިޔާސީ އިންތިޚާބު ކާމިޔާބު ކުރެއްވި ރައީސުލްޖުމްހޫރިއްޔާ ޑރ މުހައްމަދު މުއިއްޒަކީ އެމަނިކުފާނުގެ މެނިފެސްޓޯގައި އަންހެނުންނަށް ޗެޕްޓަރެއް ޚާއްސަކުރައްވާ، އަންހެނުން ހަގީގީ މާނައިގއި ބާރުވެރިކުރުމުގެ މަތިވެރި މަގްސަދުގައި ވަޑައިގެންނެވި ބޭފުޅެކެވެ.

ސިޔާސީ މައިދާނުގައި ގެއްލިފައިވާ ޖިންސުގެ ހަމަހަމަކަން ހޯދާއިދީ، ހުރިހާ ގޮތަކުން އަންހެނުން ބާރުވެރިކުރުވުމަށް މުހިންމު ކަންތައްތަކެއް ކުރައްވާނެކަމަށް އެމަނިކުފާނު ވިދާޅުވަމުން ގެންދެވިއެވެ. ވަކިން ޚާއްސަކޮށް ސިޔާސީ ގޮތުން އަންހެނުން ބާރުވެރި ކުރުވުމުގެ ވާހަކައަކީ އެމަނިކުފާނު ވަރަށް ހަރު އަޑުފުޅުން ދައްކަވަމުންދާ ވާހަކަތަކެކެވެ.

ރިޔާސި އިންތިހާބު ނިމި މިހާރު މިއޮތީ މަޖިލިސް އިންތިހާބު އަރާ ހަމަވެފައެވެ. އިންތިހާބު ބޯމަތިވެފައިވައިރު، ނިކަން ކުލަ ކުލައިގެ ޕޯސްޓަރުތަކުގައި މޮޅެތި ޝިއާރުތަކާ ވައުދު ލިޔެފައި ހުންނަ މަންޒަރު ފެނެއެވެ.

ކަންމިހެން ހުރިއިރު އަންހެނުން ބާރުވެރިކުރުވުމުގެ ނަމުގައި އައި ސަރުކާރުން މަޖިލީހަށް ނެރެފައިވާ އަންހެނުންގެ ނިސްބަތް ކިހާ ވަރެއްތޯއެވެ؟ ޕްރައިމަރިގައި ކުރިމަތިލީ ގިނަ އަންހެން ކެންޑިޑޭޓުން ކަޓުވާލުމަށް ފަހު އެއްކަލަ ނަމުން އަންހެނުން ބާރުވެރިކުރުވަން އައި ސަރުކާރުން ދެއްކީ އަންހެނުންނަކީ ފެނު ކައްކާ ބޮލިތަކެއް ފަދައިންނެވެ.

މި ވެރިކަން ގެނައުމަށް ފަސް އަހަރު ދުވަހު މަގުމަތީގައި އަޑު އުފުލި މީހުންގެ ތެރޭގައި ގިނައީ އަންހެނުންނެވެ. ރައީސް އަބްދުﷲ ޔާމީން މިނިވަންކުރުމަށް ކުރި ހުރިހާ މުޒާހަރާއެއްގައި އިސްކޮށް ތިބީ އަންހެނުންނެވެ. ރަޔަޓު ގިޔަރުގައި ތިބި ފުލުހުން ފެންނަ އިރަށް މުސްތަޝާރުން ވަޒީރުން އޭރު ފިއްލެވިއިރު ގައުމުގެ ހައްގުގައި މޭ އައްޑަނައަކަށް ހަދައިގެން ނުކުރީ އަހަރުމެން އަންހެނުންނެވެ.

މިއަދު އެ އަންހެނުންނަށް ފުރުސަތެއް ދޭން ވީމާ ވަލު ދޮރާށިން ބަޔަކު ވައްދާ ހިޔަޅުގެ ރޭވުން ރާވައިގެން މި ސަރުކާރުން ނިކަން ސަކަރާތް އެބަޖަހައެެވެ.

ކަރުދާހުގައި ނިކަން ސަރީހަ އިބާރާތުން އަންހެނުން ބާރުވެރިކުރުވުމުގެ ވާހަކަ ލިޔެ ބޮޑެތި ޕެރެގްރާފުތައް ލިޔުނު މީހުން މިއަދު އެ ހަނދާން ނެތުނީ ހެއްޔެވެ.

އަންހެނުން ބާރުވެރިކުރުވުމަކީ އެއްީ ހަގީގީ މާނައިގައިވެސް ކުރަން ޖެހޭނެކަމެކެވެ. ނަމަވެސް ނަމަވެސް ވެރިކަން ލިބިވަޑައިގެން ސަރުކާރު އެކުލަވާލާ، ވުޒާރާތަކާއި ކުންފުނިތަކުގެ މަތިފަޑިއަށް ބޭބޭފުޅުން އައްޔަންކުރައްވަމުން ގެންދަވާއިރު، ޖިންސުގެ ހަމަހަމަކަމަށް ކުރިން ދެންނެވި މިންވަރަށް ބައްލަވާ، އެކަމަކީ ޚާއްސަ ކަމެއްގެ ގޮތުގައި ދެކިގެން، ކުރައްވަމުންދާ ތަނެއް މިހާތަނަށް ފެންނން ނެތެވެ.

ކެބިނެޓަށް އެކަނި 22 ބޭފުޅުން އައްޔަންކުރެއްވި އިރު ތިއްބެވީ އެންމެ 3 އަންހެން ވަޒީރުން. އެއީ ކެބިނެޓުގެ އެންމެ 13 އިންސައްތަ. ނިމިދިޔަ ސަރުކާރަށްވުރެ ވެސް ދެބައި ކުޅަ އެއްބަޔަށް ވުރެ ދަށް އަދަދެއް. އޭގެ އިތުރުން 22 އަކަށް ކުންފުނި އޮތް އިރު، އެމްޑީ ފެންވަރުގެ ތިއްބެވީ އެންމެ 6 އަންހެން ބޭފުޅުންނެވެ.

ތަފާތު ދައްކާނެކަމަށާއި، އިސްވާރުންގެ ސަފުތަކުން އަންހެނުންނަށް ޖާގަ ހޯދައިދޭނެކަމުގެ ވައުދާއެކު، އެތައް ހާސް އަންހެނުންގެ ވޯޓު ހޯދައިގެން އައިސް، މީގެ ކުރިން ސަރުކާރުތަކުން ވީ އިހުމާލު ހަމަ އެގޮތަށް ތަކުރާރުވެގެން ދިއުމަކީ ބަލައިގަނެވޭނެކަމެއް ނޫނެވެ.

މަޖިލީހުގައިވެސް މިފަހަރު ކުރިމަތިލާ އަންހެނުންނގެ ނިސްބަތަކީ އެންމެ 10 ޕަސެންޓެވެ. މިއީ ދެރަ ވަރުގެ ދެރަ ފެންވަރުގެ ކަންކަމެވެ. އަންހެނުންނަކީ ސިޔާސީ ގޮތުން ތުން ފުހިންގެ ގޮތުގައި ދެކޭ ބަޔަކުވެސް ތިބިއިރު އަހަރުމެން އަންހެނުން މިކަމާ ނިކަން ފުންކޮށް ވިސްނަން ވެއްޖެއެވެ.