އާދެ 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ދިވެހިރާއްޖޭގެ 8 ވަނަ ރައީސުލްޖުމްހޫރިއްޔާ ހުވާ ކުރެއްވީ ދިވެހިރާއްޖޭގެ ރައްޔިތުންނަށް އެތައް ހުވަފެންތަކެއް ދެއްކެވުމަށްފަހުގައެވެ.

ހުވާ ކުރުމުގެ ކުރިން ރައްޔިތުންނާ މުހާތަބު ކުރެއްވި ކޮންމެ ފަހަރަކުވެސް އެވެނިކަމެއް، މިވެނިކަމެއް ވެރިކަން ލިބިއްޖެނަމަ ކުރައްވާނެކަމަށް ވިދާޅުވެފައިވެއެވެ.

ވެރިކަން ލިބިއްޖެއެވެ. ރިޔާސީ އިންތިޚާބްގެ ދެވަނަ ބުރުން އެމްޑީޕީގެ ކެންޑިޑޭޓް ކުރީގެ ރައީސް އިބްރާހިމް މުހައްމަދު ޞާލިހް ބަލިކޮށްގެންނެވެ. ރައްޔިތުން ރައީސް މުއިއްޒަށް ވޯޓު ދެެއްވި ސަބަބު އޮތީ ތިބޭފުޅުންގެ ލޮލު ކުރިމަތީ ހާމަޔަށްކަން ޔަގީނެވެ. އާދެ! ލޮބުވެތި ރައީސް އަބްދުﷲ ޔާމީން އަބްދުލްގައްޔޫމްގެ ހައްގުގައިއެވެ. އެމަނިކުފާނު މިނިވަންކޮށްދެއްވާނެ ކަމުގެ އުންމީދުގައެވެ.

ވެރިކަން ލިބިގެން މިހާރު ތިން މަސްވެއްޖެއެވެ. ވެރިކަން ލިބުމުން އެކުލަވާލި ވައުދު ފޮތުގެ ވާހަކަ އަޅުގަނޑުމެންނަށް ދެކެވުނު އަދަދުވެސް ބަޔާންކުރަން ދަތިއެވެ. "ހަފްތާ 14" ގައި އެކުލަވާލީ "ފެށުން" އެކަންޏެވެ. ވެރިކަމުގެ 100 ދުވަސް ނިމުނު އިރުވެސް ފަށަން ބުނި އެތައް ކަމެއް ފެށިފައި ނުވި އިރު އަދިވެސް ބުނަމުން މިދަނީ އެވެނި މިވެނި ކަމެއް ފަށަނީ ކަމަށެވެ. އާދެ އާދެ.. ބަޖެޓްގައި ނުހިމަނާ މަޝްރޫއުތައް ފަށާނަމޭ ވިދާޅުވަނީ މިވެރިޔާއެވެ. ދެން ފެށެން ނެތްކަން އެނގިލައްވާއިރު ކޮންފެށުމެއް ފަށާ ވާހަކަތޯ އެ ދައްކަވަނީ؟

ރައްޔިތުން އުފައްދާނެ ސުވާލުތަކާމެދު ހިޔާލެއް ފިކުރެއް މިވެރިޔާގެ ނެތެވެ.

އިންޑިއާ ސިފައިން ބޭލުމުގެ ވައުދަށް އަލިއަޅުވާލާއިރު ކެމްޕެއިން ކުރެއްވި އިރު ވިދާޅުވީ އިންޑިޔާ ސިފައިން ބާލާނެކަމަށެވެ. ވެރިކަމަށް އާދެވުމުން ވިދާޅުވީ އިންޑިޔާ ސިފައިން ބޭލުމުގެ މަސައްކަތް ފައްޓަވާނެކަމަށެވެ.

މިއީ ދެން ކިހާ ބޮޑު ކަމެއްހެއްޔެވެ. އިންޑިޔާ ސިފައިން ނުބޭލުމުން ބޭލުވީ އެމީހުންގެ ޔުނީފޯމެވެ. ދެންވެސް މި ކިޔަނީ އެ މަސައްކަތް ހަމަ ފަށަނީ ކަމަށެވެ.

ދެން ފްލެޓާއި ގޯތި ދިނުން ކަމަށް ބަލާލިއިރު ކުރީ ސަރުކާރުން ހުޅުމާލޭ ދެވަނަ ފިޔަވަހީގައި އަޅަން ފަށާފައިވާ ފްލެޓްތައް ބަހާފައިވަނީ އެއްވެސް އުސޫލެއްނެތިއެވެ، އެ ފްލެޓްތައް ހައްގު ފަރާތްތަކަށް ބަހަން ފަށާނެ ކަމަށް ރައީސް މުއިއްޒު ވިދާޅުވިއެވެ. ސުވާލަކީ ފެށިއްޖެތޯއެވެ.

ސިއްރު އެއްބަސްވުންތައް ހާމަކުރުން ކަމަށް ވިޔަސް ހަމަ މިވަރެއްގައެވެ. އެއް ދުވަހު ދައްކާ ވާހަކަ އާއި މެދު އަނެއް ދުވަހު ސުވާލުކުރުމުން މުޅިން ވާހަކަ ބަދަލުކޮށްލައްވައެވެ. މިހާރު ރަށްރަށަށް ކުރައްވާ ދަތުރުފުޅުތަކަށް ބަލާލާ ނަމަ އެ ދަތުރުފުޅުތަކުގައި ވެސް ވާހަކަ ބަހައްޓަވަނީ ހަމަ މި ރާގަށެވެ.

ފަށަނީ ފަށަނީ ކިޔަނިކޮށް ދައުރު ކަންނޭނގެ ނިމޭނީ...