އދ. ދިގުރަށުގައި ވިހެއުމަށްފަހު އެއްލާލާފައި އޮތް ކުއްޖާގެ ހަށިގަނޑު ވަޅުލުމަށް ހުއްދަ ދީފިއެވެ.

ވިހެއުމަށް ފަހު ޕްލާސްޓިކު ކޮތަޅަކަށް ލާ ފެނުނީ މިދިޔަ އަހަރުގެ ޑިސެމްބަރު މަހުގެ ތިން ވަނަ ދުވަހު ދިގުރަށު ކުނިގޮނޑުންނެވެ. އެކުއްޖާގެ މަރުގެ މައްސަލައިގައި ސްރީލަންކާގެ އަންހެނެއް މިހާރު ވަނީ ބަންދުގައި ބަހައްޓައިގެން އޭނާގެ ޝަރީއަތް ކުރިއަށް ގެންދަމުންނެވެ.

ކުއްޖާގެ ހަށިގަނޑު ވަނީ ޑިސެމްބަރު 16 ވަނަ ދުވަހު އިންޑިއާއަށް ޕޯސްޓުމޮޓާމް ހަދަން އިންޑިއާއަށް ފޮނުވާފައިއެވެ. އަދި ޕޯސްޓު މޮޓާމްއަށް ފަހު ޑިސެމްބަރު 22 ވަނަ ދުުވަހު އެކުއްޖާގެ ހަށިގަނޑު ވަނީ އަނބުރާ ރާއްޖެއަށް ގެނެވިފައިއެވެ.

އަނބުރާ ރާއްޖެއަށް ގެނައުމަށްފަހު އެކުއްޖާގެ ހަށިގަނޑު ވަނީ ގަލޮޅު ސަހަރާގައި ހުންނަ މޯޗަރީގައިއެވެ. މާލެ ގެނައުމަށްފަހު ކުއްޖާގެ ހަށިގަނޑާއިމެދު ވަކި ގޮތެއް ހަދާނެކަމަށް ފުލުހުން ހާމަކޮށްފައިއެއް ނުވެއެވެ.

ކުއްޖާގެ މަންމަ ކަމަށް ލަފާކުރެވޭ މީހާ އަކީ އެ ރަށު ގެންޓު ހައުސްގައި މަސައްކަތް ކުރާ މީހެއްކަމަށް އެ ރަށު މީހުން ވަނީ ހާމަކޮށްފައިއެވެ. އަދި ދޫހެދުން ލައިގެން އުޅޭ މީހެއް ކަމުން އޭނާ ބަނޑުބޮޑުކަން ނޭނގުނީކަމަށްވެސް އެ ރަށު މީހުން ވަނީ ހާމަކޮށްފައިއެވެ.