ޗައިނާއާއެކު ސިޔާސީ ގުޅުން ބާއްވާ އެފްރިކާގެ 53 ގައުމަކުން އެތެރެކުރާ ހުރިހާ މުދަލަކުން ޓެރިފް ނުވަތަ އިމްޕޯޓް ޓެކްސް ކަނޑާލަން ޗައިނާ ސަރުކާރުން ނިންމައި، އެކަން އިއުލާންކޮށްފިއެވެ.

ޗައިނާ ސަރުކާރުން ހާމަކޮށްފައިވާ ގޮތުގައި، މި ނިންމުމުގެ ދަށުން އެފްރިކާގެ އެ ގައުމުތަކުން ޗައިނާއަށް އެތެރެކުރާ އެއްވެސް އުފެއްދުމަކުން އިމްޕޯޓް ޓެކުހެއް ނުނަގާނެއެވެ. މި އާ ސިޔާސަތަށް އަމަލުކުރަން ފެށުމަށް ހަމަޖެހިފައިވަނީ 2026 ވަނަ އަހަރުގެ މެއި މަހުން ފެށިގެންނެވެ.

މި ފުރުސަތު ދިނުމަށް ނިންމާފައިވަނީ ޗައިނާއާއެކު ރަސްމީކޮށް ޑިޕްލޮމެޓިކް ގުޅުން ގާއިމުކޮށްފައިވާ އެފްރިކާގެ ގައުމުތަކަށެވެ. މިއީ އެފްރިކާގެ ގައުމުތަކުގެ އުފެއްދުންތަކަށް ޗައިނާގެ ބޮޑު ބާޒާރުން ފުރުސަތު ހުޅުވާލައި، އެ ގައުމުތަކުގެ އިގްތިސާދީ ކުރިއެރުމަށް އެހީތެރިވުމުގެ މަގްސަދުގައި ނިންމި ނިންމުމެއް ކަމަށް ބެލެވެއެވެ.

ދުނިޔޭގެ ދެވަނައަށް އެންމެ ބޮޑު އިގްތިސާދު ކަމަށްވާ ޗައިނާއިން މިފަދަ ފިޔަވަޅެއް އެޅުމަކީ، އެފްރިކާގެ ބައްރުގެ ގައުމުތަކާއި ޗައިނާއާ ދެމެދު އޮތް ވިޔަފާރީގެ ގުޅުން އައު އުސްމިންތަކަކަށް ގެންދިއުމަށް އެޅުނު މުހިންމު ފިޔަވަޅެކެވެ.

މި ބަދަލާއެކު އެފްރިކާގެ ދަނޑުވެރިކަމާއި އުފެއްދުންތެރިކަމުގެ ސިނާއަތަށް ބޮޑު ކުރިއެރުމެއް ލިބޭނެ ކަމަށް މާހިރުން ލަފާކުރެއެވެ.