ސަރުކާރަށް ރައްޔިތުންގެ މަޖިލީހުގެ މެޖޯރިޓީ ދިނީމާ ވާގޮތް ނިމިދިޔަ ފަސް އަހަރު ފެނިފައިވާ ކަމަށް ޕީއެންއެފް އުފެއްދުމުގައި އިސްކޮށް ހަރަކާތްތެރިވާ ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވެއްޖެއެވެ.

ހުސައިން މިފަދައިން ވިދާޅުވެފައިވަނީ ރައީސް އަބްދުﷲ ޔާމީން އަބްދުލްގައްޔޫމްގެ ތާއިދާއެކު ޕީއެންއެފްގެ ފަރާތުން 20 ވަނަ ރައްޔިތުންގެ މަޖިލިސް އިންތިޚާބްގައި މާފަންނު މެދު ދާއިރާ އަށް ވާދަކުރައްވާ މައިޒަރު އާދަމްގެ ކެމްޕެއިން ހަރަކާތް ރަސްމީކޮށް ފެށުމަށް ބޭއްވުނު ކަންމަތީ ޖަލްސާގައި ވާހަކަދައްކަވަމުންނެވެ.

އެގޮތުން ހުސައިން ވިދާޅުވީ ސަރުކާރު ޖަވާބުދާރީ ކުރުމަށްޓަކައި ސަރުކާރުގެ ކެންޑިޑޭޓުން މަސައްކަތެއް ނުކުރައްވާނެކަމަށެވެ. އެކަން އެންމެ ރަނގަޅަށް ނިމިދިޔަ އެމްޑީޕީގެ ފަސް އަހަރުގެ ވެރިކަމުގައި ސާބިތުވެފައިވާކަމަށެވެ.

ދިވެހިރާއްޖޭގެ މަސް ކަނޑުން ބަޔަކަށް ކުރީގެ ރައީސް އިބްރާހިމް މުހައްމަދު ޞާލިހްގެ ސިއްރު ސިޓީފުޅަކުން ވިއްކާލުމުން އެކަމަށް މަޖިލީހުގެ މެޖޯރިޓީ އަކުން ކަންބޮޑުވުން ފާޅުކޮށް މަސައްކަތްކޮށްފައި ނުވާކަމަކީ އެކަމުގެ މިސާލެއްކަމަށްވެސް ހުސައިން ވަނީ ފާހަގަކުރައްވާފައެވެ.

އޭގެއިތުރުން ދިވެހިރާއްޖޭގައި އިންޑިޔާގެ އަސްކަރިއްޔާގެ ބަޔަކު އައިސް ތިބުމުން ވެސް އެކަމަށްވެސް މަޖިލީހުގެ މެޖޯރިޓީ އަކުން އަޅާލާފައި ނުވާކަމަށް ހުސައިން ވިދާޅުވިއެވެ.

އަދި އޭގެއިތުރުން ހުސައިން ވިދާޅުވީ އަދުގެ ސަރުކާރަކީ ރައްޔިތުން އެކަން ކަން ބަދަލުކުރަން ގެނައި ސަރުކާރެއްކަމަށެވެ. ނަމަވެސް ފެނިގެން ދަނީ އޭގެއިން އެއްކަމެއްވެސް ނުކުރައްވާ މަންޒަރުކަމަށް ވިދާޅުވެ ހުސައިން ވަނީ ސަރުކަރަށް ފާޑުކިޔުން އަމާޒުކުރައްވާފައެވެ.

ހުސައިން އިތުރަށް ވިދާޅުވީ އިންޑިޔާގެ ސިފައިން ސަރުކާރަށް ނުބޭލުމުން ބޭލީ އެމީހުންގެ ޔުނީފޯމް އެކަނިކަމަށެވެ.

ފެންނަމުން ދަނީ ރައްޔިތުން އެދުނު ބަދަލު ނޫންކަމުން ދެން މަޖިލީހުގެ މެޖޯރިޓީ ދިފއްޔާ އުޅެން ޖެހޭނީ ކޮންތަނެއްގެ ކަމެއް ނޭނގޭކަމަށްވެސް ހުސައިން ވަނީ ވިދާޅުވެފައެވެ.

މިކަން ކަމަށް ހައްލު ގެނައުމަށާއި ސަރުކާރު ޖަވާބުދާރީ ކުރެވޭނީ 20 ވަނަ ރައްޔިތުންގެ މަޖިލީހުގެ މެޖޯރިޓީ ޕީއެންއެފްގެ ކެންޑިޑޭޓުންނަށް ދީގެންކަމަށްވެސް ހުސައިން ވާހަކައިގައި ފާހަގަކުރެއްވިއެވެ.