ޗައިނާއިން އީރާނަށް ފޯރުކޮށްދެމުންދާ ޒަމާނީ ސަވައިލެންސް އަދި ރިއަލް ޓައިމް ޓްރެކިންގެ އެހީތެރިކަމާއެކު އީރާނުގެ އަސްކަރީ ބާރު ގަދަވަމުންދާކަން ހާމަވެއްޖެއެވެ.

ޗައިނާގެ ކުރިއަރާފައިވާ ސެޓެލައިޓް ޓެކްނޮލޮޖީ ބޭނުންކޮށްގެން، އެމެރިކާގެ އަސްކަރީ ބިލްޑްއަޕްތަކާއި، ސިފައިން ތިބި ތަންތަނުގެ ތަފްސީލުތައް އީރާނުގެ އަސްކަރިއްޔާއަށް މިހާރު ދަނީ ލިބެމުންނެވެ. މީގެ ތެރޭގައި އެމެރިކާގެ ކަނޑުގެ ސިފައިންގެ މަނަވަރުތަކާއި ވައިގެ ސިފައިންގެ ހަރަކާތްތަކާ ބެހޭ ރިއަލް ޓައިމް ޑޭޓާ ހިމެނޭއިރު، މީގެ ސަބަބުން އީރާނަށް އެ ސަރަހައްދުގައި އޮތް އެމެރިކާގެ ނުފޫޒާ ދެކޮޅަށް ފައިތިލަ ސާބިތުކުރުމުގެ ފުރުސަތު ވަނީ ބޮޑުވެފައެވެ.

މި އެހީތެރިކަމުގެ ސަބަބުން، ކުރިން އެމެރިކާއަށް އޮތް އަސްކަރީ ކުރިއެރުން ކުޑަވެ، ދެ ގައުމުގެ ދެމެދުގައި އޮތް ބާރުގެ ބެލެންސް ހަމަހަމަވަމުންދާ ކަމަށް މުހައްލިލުން ފާހަގަކުރެއެވެ. ޗައިނާއަކީ އީރާނުގެ އިތުބާރު ހުރި ސަވައިލެންސް އަދި ރިކޮނައިސަންސް ޕާޓްނަރެއްގެ ގޮތުގައި ހަރަކާތްތެރިވަމުން ދިއުމަކީ، އެ ސަރަހައްދުގައި ހުޅަނގުގެ ބާރުތަކަށް އޮތް ބޮޑު ގޮންޖެހުމަކަށް ވަނީ ވެފައެވެ.

މިކަމުގެ ސަބަބުން އީރާނަށް އެމެރިކާގެ އަމާޒުތައް ދެނެގަނެ، އެކަމަށް ދުރާލާ ތައްޔާރުވުމުގެ ގާބިލުކަން ވަނީ ލިބިފައެވެ. މިއީ ޗައިނާގެ ޒަމާނީ ޓެކްނޮލޮޖީގެ އެހީގައި، މިނިވަން ދައުލަތްތަކުގެ ދިފާއީ ބާރު ވަރުގަދަކުރުމަށް ކުރަމުންދާ މުހިންމު މަސައްކަތެއްގެ ގޮތުގައި ފާހަގަކުރެވެއެވެ.