ބާޒާރުގައި އޮރެންޖު ލިބުން ދަތިވެ، އޭގެ އަގު މައްޗަށް އަރައިފިއެވެ.
މާލެ އާއި ހުޅުމާލޭގެ ބައެއް ކަންމަތީ ފިހާރަތަކުން އަދި މާރުކޭޓުގެ ގިނަ ގޮޅިތަކުން ވެސް ވަނީ އޮރެންޖު ހުސްވެފައި ކަމަށް މައުލޫމާތު ލިބިފައިވެއެވެ.
ރޯދަ މަސް ފެށުމުގެ ކުރިން، އޮރެންޖުގެ އަގު ހުރީ -/5ރ. އާއި -/7ރ.އާ ދެމެދުގައި ނަމަވެސް ރޯދަ މަސް ފެށުމާ އެކު ބައެއް ފިހާރަތަކުން އޮރެންޖުގެ އަގު -/7ރ. އާއި -/10ރ.އާ ދެމެދުގެ އަގަކަށް ޖެއްސިއެވެ.
ޒަރޫރީ ކާބޯތަކެތި ހެޔޮ އަގުގައި ވިއްކާނެ ކަމަށްބުނެ އެސްޓީއޯއިން އޮރެންޖު ކިލޯއެއް ވިއްކަނީ -/40ރ އަށެވެ. އެއީ ގާތްގަނޑަކަށް އޮރެންޖެއް -/6ރ. އަށެވެ.
އެސްޖޭ މޯލް ފަދަ ބޮޑެތި ތަންތަނުގައި އޮރެންޖު ކިލޯއެއް -/60ރ.ގައި ހުރިއިރު، އޮރެންޖެގެ އަގު ޖެހެނީ ގާތްގަނޑަކަށް -/8ރ.އިން މައްޗަށެވެ. ރެޑްވޭވްގެ ފިހާރަތަކުން އޮރެންޖު ވިއްކަމުން އައީ -/8ރ.ގައެވެ.
މާރުކޭޓުގެ ބައެއް ގޮޅިތަކުގައި މިހާރު އޮރެންޖެއްގެ އަގު ވަނީ -/10ރ.އަށް އަރާފައެވެ. ބައެއް ގޮޅިތަކުން އޮރެންޖު ވަނީ އެއްކޮށް ހުސްވެސް ވެފައެވެ.
ރޯދަ މަސް ފެށިއިރު، ހޯލް ސޭލް ފިހާރަތަކުން އޮރެންޖު ކޭހެއް ވިއްކަމުން އައީ -/850ރ.އަށް ނަމަވެސް، މިހާރު ހުރީ -/950ރ.އަށް ކޭހެއް ކަމަށް މާރުކޭޓުގެ ގޮޅިތަކުގެ ވެރިން ބުނެފައިވެއެވެ.
