މި ފަށާ ރޯދަމަހުގެ ކޮންމެ ދުވަހަކު އިނާމު ލިބޭ ޕްރޮމޯޝަންތަކެއް ދިރާގުން އިއުލާންކޮށްފި އެެވެ.

ޕްރޮމޯޝަންތަކުގެ އިތުރަށް ރޯދަމަހާ ދިމާކޮށް ދިރާގުގެ އެޕްލިކޭޝަން މެދުވެރިކޮށް ލިބޭ ހިތްގައިމު އޮފާތަކެއް ވެސް އެ ކުންފުނިން ވަނީ ތައާރަފްކޮށްފަ އެވެ.

އެ ޕްރޮމޯޝަންތަކާއި އޮފާތަކުގެ ތެރޭގައި ހިމެނެނީ:

ރޯދަ ބޯނަސް,ޕޯސްޓްޕެއިޑް އަދި ފައިބާ ބްރޯޑްބޭންޑް ޑޭޓާ ބޫސްޓާ,ޝެއާ ޔޯ ހެޕިނެސް'ހިތްތައް' ހޯދައިގެން ލިބޭ އިނާމުތައްދިރާގު އީޒޯން ސަޕްރައިޒްތަކެވެ.

މީގެ އިތުރުން ދިރާގު އެލީޓް ކްލަބް މެމްބަރުންނަށް ރޯދަމަހަށް ހާއްސަ އޮފާތަކެއް އެކި ޕާޓްނަ އައުޓްލެޓްތަކުން ލިބޭނެ އެވެ. މި އޮފާތަކާ ބެހޭ އިތުރު ތަފްސީލް ދިރާގު އެޕް މެދުވެރިކޮށް ބަލައިލެވޭނެ އެވެ.

މިއަހަރުގެ ދިރާގު ރޯދަމަހުގެ ކެމްޕޭން ޝިއާރަކީ 'ހެޔޮ ހިތުން' އެވެ. މި ކެމްޕޭން ބިނާކޮށްފައިވަނީ މި ބަރަކާތްތެރި މައްސަރުގައި އެކަކު އަނެކަކަށް އޯގާތެރިވެ، ހިތްހެޔޮ އަމަލުތައް ކުރުމުގެ މައްޗަށެވެ.

އެ ޝިޔާރާ ގުޅުވައިގެން ދިރާގުގެ ސީއެސްއާރު ޕްރޮގްރާމްގެ ދަށުން މަމްސް އެއިޑް އެން.ޖީ.އޯގެ 'ރަމަޟާން އެއިޑް' ކެމްޕޭންގެ ޕާޓްނަރަކަށްވެ، އެހީތެރިކަން ބޭނުންވާ 100 އާއިލާއަކަށް ދިރާގުން ވަނީ އެހީތެރިކަން ފޯރުކޮށްދީފަ އެވެ. އަދި މިޝަން ފޯ މައިގްރަންޓް ވޯކާސް މޯލްޑިވްސް (އެމްއެމްޑަބްލިއުއެމް)އާ ގުޅިގެން މާލެ ސަރަހައްދުގައި ދިރިއުޅޭ ބިދޭސީންނަށް ހާއްސަ އިފްތާރު ޕެކްތަކެއް ވެސް ދިރާގުން ފޯރުކޮށްދޭނެ އެވެ.

މީގެ އިތުރުން ރޯދަމަހަށް ހާއްސަކޮށްގެން ދިރާގުން މީގެ ކުރިންވެސް ކުރިއަށްގެންދިޔަ ތަށިބަރި މޫވްމަންޓާއި ދިރާގު ގުޑިފެސްޓް މި އަހަރުވެސް ކުރިއަށްގެންދާނެ އެވެ. މާލެ ސަރަހައްދުގެ އިތުރުން ރާއްޖޭގެ އެކި ކަންކޮޅުތަކުގައި ވެސް މި ހަރަކާތްތައް ކުރިއަށްގެންދިޔުމަށް ވަނީ ހަމަޖެހިފަ އެވެ.

އެހެން އަހަރުތަކެކޭ އެއްފަދައިން މިއަހަރު ވެސް ދިރާގު ޕޭ އެޕް އަދި ވެމް ޕޯޓަލް ނުވަތަ އެސްއެމްއެސް މެދުވެރިކޮށް ވެސް ކަސްޓަމަރުންނަށް ފަސޭހަކަމާއެކު ފިތުރު ޒަކާތް ދެއްކޭނެ އެވެ.

ދިރާގުން ކޮންމެ އަހަރަކު ވެސް ރޯދަމަހާ ގުޅުވައިގެން ކަސްޓަމަރުންނަށް ހާއްސަ އާ އޮފާތައް ގެނެސްދެ އެވެ.