ރައީސް ޑރ. މުހައްމަދު މުއިއްޒަކީ އެމެރިކާގެ ރައީސް ޑޮނަލްޑް ޓްރަމްޕް ފަދައިން، ގައުމަށްވުރެ ތިމާ ބޮޑުކަމަށް ދެކި ބާރާއި ނުފޫޒަށް ފެންބޮވައިގެންފައިވާ ބޭފުޅެއްގެ ގޮތުގައި ސިފަކުރައްވައި، ޕީ.އެން.އެފްގެ ނައިބު ރައީސް ޑރ. މުޙައްމަދު ޖަމީލް އަޙްމަދު ސަރުކާރަށް ފާޑުކިޔުއްވައިފިއެވެ.
އެކްސްގައި ކުރެއްވި ޕޯސްޓެއްގައި ޑރ. ޖަމީލް ވިދާޅުވީ، މެދުއިރުމަތީގެ ގައުމުތަކުން ކުރިން ޓްރަމްޕަށް ސަނާކިޔުމަށްފަހު މިއަދު އެ ސަރަހައްދު ހަނގުރާމައިގެ މައިދާނަކަށް ބަދަލުވުމުން ހިތާމަކުރާ ފަދައިން، ރާއްޖޭގައި ވެސް ސަރުކާރަށް ސަނާކިޔާ ބަޔަކު އުފައްދައިގެން ގައުމު މިވަނީ ނުރައްކާތެރި ފުންގަނޑަކަށް ވައްޓާލާފައެވެ.
ނުކުރަން ބުނި ހުރިހާ ކަމެއް މިއަދު ކުރަމުންދާކަން ފާހަގަކުރައްވައި، ޑޮލަރުގެ އަގު 20 ރުފިޔާއަށްވުރެ މައްޗަށް އެރުމާއި، އިންފްލޭޝަން އިންތިހާއަށް އުފުލުމާއި، ޕެންޝަން ފަންޑު ހުސްކޮށް ފައިސާ ޗާޕުކުރުމުގެ އިތުރުން ސިޔާސީ ވަޒީފާތަކުން ދައުލަތް ފުރާލާފައިވާ ކަމަށް ޑރ.ޖަމީލް ތުހުމަތު ކުރެއްވިއެވެ.
އަދި އެންމެ ފަހުން ގައުމުގެ ގާނޫނުއަސާސީއަކީ "ކުޅޭކުޅޭ އެއްޗަކަށް" ހަދާފައިވާ ކަމަށާއި، މިފަދަ ޚުދުމުޚުތާރު ސިޔާސަތުތަކުގެ ސަބަބުން އާޚިރުގައި ގައުމަށް ލިބޭނީ އިއާދަނުކުރެވޭ ފަދަ ބޮޑެތި ގެއްލުންތަކެއްކަން ޑރ. ޖަމީލް ހަނދާންކޮށްދެއްވިއެވެ.
