އިސްރާއީލުގެ ލާއިންސާނީ އަމަލުތަކަށް ފާޑުކީ އެމެރިކާ ސިފައިންގެ މީހަކު، އެމެރިކާގެ އަސްކަރިއްޔާއިން ތަހުގީގު ކުރަން ފަށައިފިއެވެ.
ޖޮނަތަން އެސްޓްރިޖް ނަމަކަށް ކިޔާ، އެމެރިކާ ސިފައިންގެ ތެރޭގައި 20 އަހަރަށް ވުރެ ގިނަ ދުވަހު ޚިދުމަތްކޮށްފައިވާ މި މީހާ ތަހުގީގު ކުރަން ފެށީ، އިސްރާއީލް ސަރުކާރުގެ ސިޔާސަތުތަކަށާއި އެ ގައުމުން ހިންގާ އަމަލުތަކަށް ސޯޝަލް މީޑިއާގައި އާންމުކޮށް ފާޑުކިޔުމާ ގުޅިގެންނެވެ.
މި މައްސަލައިގައި ފާހަގަކުރެވޭ އެންމެ ބޮޑު ކަމަކީ، އިސްރާއީލަށް ފާޑުކިޔުމުން އެސްޓްރިޖް އަކީ "ގައުމީ ސަލާމަތަށް އޮތް ނުރައްކަލެއް" ކަމަށް ބައެއް މަސްދަރުތަކުން ލޭބަލްކޮށްފައިވާ ކަމެވެ. މިއީ އިސްރާއީލުގެ ދިފާއުގައި އެމެރިކާއިން ކޮންމެ ފަދަ ކަމެއްވެސް ކޮށްފާނެކަން ހާމަވާ ކަމެއްގެ ގޮތުގައި ބައިނަލްއަގްވާމީ އޮބްޒާވަރުން ދެކެއެވެ.
އެމެރިކާގެ އަސްކަރީ ގަވާއިދުތަކުގެ ދަށުން ސިފައިންނަށް ސިޔާސީ ބަޔާންތައް ދިނުން މަނާކޮށްފައި އޮތް ނަމަވެސް، އިސްރާއީލާ ދެކޮޅަށް ވާހަކަދައްކާ ކޮންމެ މީހަކަށް ހަރުކަށި ފިޔަވަޅު އެޅުމަކީ އެމެރިކާއިން އިސްރާއީލުގެ މަސްލަހަތު ހިމާޔަތްކުރުމަށް ގެންގުޅޭ ހަރުކަށި ސިޔާސަތުގެ ދަށުން ކުރާ ކަމެކެވެ.
މި ހާދިސާއާ ގުޅިގެން، އެމެރިކާ ސިފައިންގެ ތެރޭގައި ޚިޔާލުފާޅުކުރުމުގެ މިނިވަންކަން އޮތް މިންވަރާ މެދު ބޮޑެތި ބަހުސްތަކެއް ވަނީ އުފެދިފައެވެ. އަދި ބޭރުގެ އެކުވެރި ގައުމެއްގެ ގޮތުގައި ބަލާ އިސްރާއީލަށް ފާޑުކިޔުމަކީ، އަމިއްލަ ގައުމަށް ވަފާތެރިނުވުން ކަމުގައި ބެލުމަކީ އެމެރިކާގެ އަސްކަރިއްޔާގެ ތެރޭގައި އޮތް ނުފޫޒު ހާމަވާ ކަމެކެވެ.
އޮފިޝަލުން މި ތަހުގީގާ ގުޅޭ ތަފްސީލެއް އަދި ހާމައެއް ނުކުރެއެވެ. ނަމަވެސް މި މައްސަލައިގެ ސަބަބުން ކުރިއަށް އޮތްތަނުގައި އިސްރާއީލާ ދެކޮޅަށް އަޑުއުފުލާ ސިފައިންނަށް ކުރިމަތިވެދާނެ ފިއްތުންތައް އިތުރުވާނެ ކަމަށް ތަޖުރިބާކާރުން ބުނެއެވެ.
