ގައުމުގެ މުސްތަގުބަލަށްޓަކައި ރިޝްވަތުގެ ހުތުރު ފައިސާއަށް ރައްޔިތުން އެބައިމީހުންގެ އަގު ބޮޑު ނަފްސުތައް ވިއްކާނުލުމަށް ވެލިދޫ ދާއިރާގެ މަޖިލިސް މެމްބަރު މުހައްމަދު އައްބާސް ގޮވާލައްވައިފިއެވެ.
އައްބާސް މިފަދައިން ވިދާޅުވެފައިވަނީ، ޤައުމުގެ މިހާރުގެ ހާލަތާއި ރައްޔިތުންގެ ދިރިއުޅުމަށް އަންނަމުންދާ ބަދަލުތަކާ ގުޅޭގޮތުން ކަންބޮޑުވުން ފާޅުކުރައްވާ އެކްސްގައި ކުރެއްވި ޕޯސްޓެއްގައެވެ. އެ ޕޯސްޓުގައި ވަނީ، ފާއިތުވި ދެ އަހަރު ދުވަހު ސަރުކާރުގެ އަމަލުތައް ހުރިގޮތުންނާއި ކަންތައްތައް ހިނގަމުންދާ ގޮތަށް ބަލާއިރު، ރައްޔިތުންގެ ހާލަތު އިތުރަށް ގޯސްވަމުންދާ ކަން ފާހަގަކުރައްވާފައެވެ.
ރައްޔިތުންގެ އަތްމަތި ދަތިވެ، ޤައުމު އަޅުވެތިކަމަކާ ދިމާލަށް ދިއުމުގެ ބިރު އޮތްކަން ވެސް ފާހަގަކުރައްވައި، ރައްޔިތުންނަށް ހެޔޮގޮތް އެދޭތީ ޕީއެންސީއަށް ވޯޓު ނުދިނުމަށް އައްބާސްގެ ޕޯސްޓުގައި ތަކުރާރުކޮށް އިލްތިމާސްކުރެއްވާފައިވެއެވެ.
މި ސަރުކާރު އައިފަހުން ތަކެތީގެ އަގު އެއްދުވަހުން އަނެއް ދުވަހަށް ބޮޑުވަމުންދާކަން ފާހަގަކުރައްވައި އައްބާސް ވިދާޅުވީ، ޑޮލަރުގެ އަގު މަތިވެ، ކަރަންޓު ބިލާއި ފެން ބިލުތައް އިންތިހާއަށް ބޮޑުވެފައިވާތީ އާންމު ރައްޔިތުންގެ ދިރިއުޅުމުގެ ހާލަތު ދަށަށް ގޮސްފައިވާ ކަމަށެވެ.
އައްބާސް އިތުރަށް ވިދާޅުވީ މި ޤައުމާއި ޤައުމުގެ މުސްތަޤުބަލާ މެދު ހެޔޮ ވިސްނުން އިސްކޮށް، ކުރިއަށް އޮތް އިންތިޚާބުގައި ރައްޔިތުންގެ ބާރު ދެއްކުމަކީ މުހިންމު ކަމެއް ކަމަށެވެ. ސަރުކާރުގެ ޚަރަދުތަކަށް ފާޑުވިދާޅުވަމުން އައްބާސް ވިދާޅުވީ، ރައްޔިތުންގެ ޓެކްސް ފައިސާއިން ރައްޔިތުންނަށް "ދަޅަ" ދެއްކުމަށް ސަރުކާރުން ސިޔާސީ ކަންކަމަށް ކުރާ ހަރަދު އިތުރުވެފައިވާ ކަމަށެވެ. އަދި ސަރުކާރުގެ ބޮޑުންގެ ޖީބުތައް ބޮޑުވެ، އެފަރާތްތަކުން މަހުޖަނުންނަށް ވަމުންދާއިރު، އާންމު ރައްޔިތުންނަށް 8000 ނުވަތަ 12000 ރުފިޔާގެ ވަޒީފާގެ ދަޅަ ދައްކައިގެން ސަރުކާރަށް ހުރިހާ ބާރެއް ނުދިނުމަށް އޭނާ ވަނީ އެދިވަޑައިގެންފައެވެ.
އައްބާސް މިފަދައިން ވިދާޅުވެފައިވާއިރު ސަރުކާރުން ބުނަމުންދަނީ ޕީއެންސީއަށް ކައުންސިލް ލިބިގެން މެނުވީ ރަށްތަކަށް ތަރައްގީ ނުގެނެވޭނެ ކަމަށެވެ. ނަމަވެސް ސަރުކާރުން މިފަހުން ގާނޫނު އަސާސީއާ ގެނައި އިސްލާހާ އެކު ކައުންސިލްއިން ފާސްނުކުރިޔަސް ސަރުކާރުން ބޭނުންވާ ކަންކަން ރަށްތަކަށް ކޮށްދިނުމަށް މަގު ފަހިވެފައިވާކަން ފާހަގަކޮށްލެވެއެވެ.
