މާފުށީ ޖަލުގެ ބައެއް ޔުނިޓް ތަކުގައި ތިބި ބަންދު މީހުން ހޫނު ގަދަވުމުގެ ސަބަބުން ނަފްސާނީ ގޮތުންނާ ޖިސްމާނީގޮތުން ވަރު ދެރަވެފައިވާ ކަމަށް މާފުށީ ޖަލުގެ ބަންދު މީހަކު ޗެނަލް 13 އަށް މައުލޫމާތު ދީފިއެވެ.

ނަން ނުޖެހުމަށް ޝަރުތުކޮށް މި ބަންދު މީހާ ބުނެފައިވަނީ ރޯދަ މަސް ފެށުނު ފަހުން އާދަޔާ ޚިލާފަށް ހޫނު ގަދަ ކަމަށާއި ގިނަ މީހުން ތިބެނީ ހާންތިވެފަ ކަމަށެވެ.

މާފުށީ ޖަލުގައި "ވާނުވާ ބަންދު" ގައި ތިބޭ އެތައް ސަތޭކަ ބަންދު މީހުން ތިބޭ ޔުނިޓް 2، 3 އަދި 4 ގައި ގާތްގަނޑަކަށް 100 ގޮޅި ހުންނަ އިރު އެއްވެސް ޔުނިޓެއްގައި ފަންކާ ހަރުކޮށްފައި ނުހުންނަ ކަމަށާ ގިނަ ގޮޅިތަކުގައި ވައި ދައުރު ކުރާ ގޮތް ހެދިފައި ނުހުރެއެވެ.

ކޮންމެ އަހަރަކު ހިޔުމަން ރައިޓްސް ކޮމިޝަނުން ނެރޭ ރިޕޯޓާއި ރެޑް ކްރެސެންޓް އަދި އދ، ފަދަ ޖަމާއަތްތަކުން ވެސް މާފުށީގެ މި ޔުނިޓްތަކުގެ ހާލަތާ ބެހޭ ގޮތުން ކަންބޮޑުވުން ފާޅުކޮށް، ބަންދުގައި ތިބޭ މީހުންނަށް "ޓޯޗާ" ނުވާނެހެން ގޮޅިތައް ފިނި ކޮށްދީފައި ބެހެއްޓުމާއި އަލިވާނެ ގޮތަކަށް ބެހެއްޓުމަށް ވެސް އިލްތިމާސް ކޮށްފައިވެއެވެ.

2023 ވަނަ އަހަރު އޭޕްރިލް މަހު ރާއްޖޭގެ ހޫނު މިން އިންތިހާއަށް ބޮޑުވެ، މި ޔުނިޓްތަކުގައި ތިބި ބަންދު މީހުން ހޫނު ގަދަވުމުގެ ޝަކުވާ ކޮށް އިހުތިޖާޖުކުރަން ފެށުމުން އެޗްއާރުސީއެމް އިން ވެސް ވަނީ މި ކަންތައް ހައްލު ކޮށްދިނުމަށް އިލްތިމާސްކޮށްފައެވެ. ނަމަވެސް އަހަރުދުވަސް ވާން ދާއިރު ކަރެކްޝަނުން އެއްވެސް ކަމެއް ކޮށްދީީފައެއް ނުވާކަން އެ ގައިދީއިން ވަނީ ފާހަގަކޮށްފައެވެ.

މިކަމާ ގުޅިގެން ކަރެކްޝަންސްގެ ބަހެއް ހޯދާލަން ޗެނަލް13އިން މީޑިޔާ އޮފިސަރަށް ގުޅާލުމުން ވިދާޅުވީ ރާއްޖެއަށް އާދަޔާ ހިލާފަށް ހޫނު ދުވަސްވަރެއްކަން ވެރިންނަށް އެނގިވަޑައިގަންނަވާ ކަމަށާ އަދި މައްސަލަ ހައްލުކުރަން މަސައްކަތްކުރަމުން ދާ ކަމަށް ވެރިން ވިދާޅުވެފައިވާ ކަމަށެވެ.

މީގެ ކުރިންވެސް މި ފަދަ މައްސަލަތައް ހައްލުކުރަން ކަރެކްޝަންސްއަށް އަންގާފައިވާއިރު ހައްލުނުވެ ލަސްވަނީ ކީއްވެތޯ ދެންނެވި ސުވާލަށް ޔުސްރީނު ވިދާޅުވީ ޖަވާބު ދެވޭނީ ޕޮލިސީ ލެވެލްގައި ކަމަށާ އެހެންކަމުން އެ ސުވާލަށް ޖަވާބު ދެވެން ނެތް ކަމަށެވެ.

ޖަލުގައި ތަފާތުކުރުންތައް ގެންގުޅޭ ކަމަށް ބުނެވެސް މީގެ ކުރިން މައްސަލަތަކެއް ފެންމަތިވެފައިވެއެވެ. އެ މައްސަލަތައް ހައްލުކުރުމަށް ހިއުމަން ރައިޓްސް ވޮޗްއިން މީގެ ކުރިން ގޮވާލާފައިވެސް ވެއެވެ.

ޖަލުގެ ގޮޅިތަކުގައި ހޫނު ގަދަވެ ގައިދީންނަށް ކެތް ނުކުރެވޭ މިންވަރަށް ގޮސްފައިވާއިރު ރާއްޖެއަށް މި ދުވަސްވަރު ވަރަސް ހޫނު ވާނެ ކަމަށް މުސުމާ ބެހޭ ގައުމީ އިދާރާއިން ހާމަކޮށްފައިވެއެވެ

މާޗު އަދި އޭޕްރީލް މަހަކީ އަހަރުގެ ތެރޭގައި ރާއްޖޭގެ ސަރަހައްދަށް ހޫނުމިން އެންމެ މައްޗަށް ދާ ދުވަސްވަރު ކަމަށާ އަދި މި ދުވަސްވަރު، ވިލާ މަދުވުމާއި ވައި މަޑުވުން އަދި ވައިގެ ތެތްކަން މަތިކޮށް ހިފެހެއްޓިފައި ހުރުމުގެ ސަބަބުން ވައިގެ ހޫނުމިނަށްވުރެ އިހްސާސް ކުރެވޭ ހޫނުމިން މަތިވާ ކަމަށް ވެސް އެއިދާރާއިން މައުލޫމާތުދެއެވެ.

މީގެ އިތުރުންވެސް މެޓް އޮފީހުން ބުނީ، މި އަހަރަކީ އެލްނީނޯ އަހަރެއް ކަމުން ހޫނުމިން އިތުރަށް މަތިވުމުގެ ފުރުސަތު އޮތްކަން ދުނިޔޭގެ މޫސުމާބެހޭ ޖަމިއްޔާއިން ލަފާކޮށްފައިވާ ކަމަށެވެ. އެލްނީނޯ އަހަރަކީ މެދުތެރެއާއި އިރުމަތީ ޓްރޮޕިކަލް ޕެސިފިކް ކަނޑުގެ ސަރަހައްދު ހޫނުވުން، ނުވަތަ ކަނޑުގެ ސަރަހައްދުގެ ފިނިހޫނުމިން އެވްރެޖަށްވުރެ މަތިވާ މަތިވުމަށް ދެވިފައިވާ ނަމެކެވެ.