ޑރ. މުހައްމަދު މުއިއްޒު، ރަސްމީ ހައިސިއްޔަތުން ކުރައްވާ ދަތުރުފުޅުތަކުގައި ކެމްޕެއިން ކުރައްވާތީ ނުރުހުން ފާޅުކޮށް ނ. ކެނދިކުޅުދޫ ކައުންސިލުން ނެރުނު ބަޔާން ބާތިލު ކުރަން ލޯކަލް ގަވާމަންޓް އޮތޯރިޓީ (އެލްޖީއޭ) އިން އެންގި މައްސަލާ ގައި އެ އޮތޯރިޓީގެ ވެރީން މަޖިލީހުގެ ލާމަރުކަޒީ ކޮމިޓީ އަށް ހާޒިރު ކުރަން ނިންމައިފިއެވެ.

އެލްޖީއޭގެ މައްސަލަ މަޖިލީހުގެ ކޮމެޓީއަށް ހުށައެޅީ އެ ރަށް ހިމެނޭ ކެނދިކުޅުދޫ ދާއިރާގެ މެންބަރު އަހްމަދު އީސައެވެ. އޭނާގެ އެ ހުށައެޅުމާ ގުޅިގެން އެލްޖީއޭ ގެ ވެރީން ކޮމެޓީއަށް ހާޒިރު ވަނީ ފާސްކޮށްފައެވެ.

ދައުލަތުގެ ވަސީލަތްތައް ނަހަމަ ގޮތުގައި ހިފައި ރަސްމީ ދަތުރުފުޅުގެ ނަމުގައި ކެމްޕެއިން ހަރަކާތްތައް ރައީސް މުއިއްޒު ހިންގުން ކުށްވެރިކޮށް މި މަހުގެ ދެވަނަ ދުވަހު ކެނދިކުޅުދޫ ކައުންސިލުން ނެރުނު ބަޔާނަކީ ރައީސްގެ ޒިންމާތަކަށް ހުރަސް އެޅުން ކަމަށް އެލްޖީއޭއިން ވަނީ އެ ބަޔާން ބާތިލުކުރަން އަންގާފައެވެ.

ނަމަވެސް ކެނދިކުޅުދޫ ކައުންސިލުން ނިންމީ ބަޔާން ބާތިލުނުކުރުމަށެވެ. އެގޮތުން އަނގަމަތީ ޓޭޕު އަޅައިގެން އެ ކައުންސިލްގެ ކައުންސިލަރުން ވަނީ ހިމޭން އިހުތިޖާޖެއްވެސް ކޮށްފައެވެ.