ދިވެހިރާއްޖޭގެ ކަނޑުގެ ސަރަހައްދުތައް ބެލެހެއްޓުމަށްޓަކައި ތުރުކީން ގެނައި ބައިރަކްތާރ ޑްރޯންތައް އުދުހެންފަށައިފިއެވެ.

ޗެނަލް 13 އަށް މައުލޫމާތު ލިބުންގޮތުގައި މި ޑްރޯންތައް އުދުހެން ފަށާފައިވަނީ ނ. މާފަރުގައެވެ.

އަދި މިއީ ޕާކިސްތާނުންނާއި ތުރުކީން ޑްރޯން ޕައިލެޓްކަން ކިޔެވި ފަރާތްތަކުގެ ޓެސްޓް ރަން އެއް ކަމަށްވެސް ވަނީ މައުލޫމާތު ލިބިފައެވެ.

މިކަމާ ގުޅޭގޮތުން އިތުރު މައުލޫމާތު ދެމުން އެމްއެންޑީއެފުން ބުނީ ނ.މާފަރު މަތިން ޑްރޯންތަކުގެ އުދުހުންތަކެއް ކުރިޔަށްގެންދެވުނު ކަމަށެވެ.

މި ޑްރޯންތަކަކީ ތުރުކީގެ ޑްރޯން ހައްދާ ކުންފުޏެއްކަމަށްވާ ބައިކާރ ގެ އުފެއްދުންކަމަށްވެސް ފާހަގަކޮށްލެވެއެވެ.

އިންޑިޔާގެ އަޅުވެތިކަމަށް ރާއްޖެ ނުގޮސް ތުރުކީން ޑްރޯންތައް ގެނައުމުން އެމްޑީޕީން ވަނީ ފާޑުކިޔުންވެސް އަމާޒުކޮށްފައެވެ.

އެގޮތުން އަންގާރަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ކެމްޕެއިންގެ ތަރުޖަމާނު އަހުމަދު އީސާ ވިދާޅުވީ އެމްޑީޕީގެ ވެރިކަމުގައި އަސްކަރީ ޑްރޯން ގެނައުމަށް ގިނަ މަސައްކަތްތަކެއް ކުރެވުނުކަމަށެވެ.

އޭނާ ވިދާޅުވީ ނިމިގެން ދިޔަ ސަރުކާރުގައި އިންޑިޔާ އިން ރާއްޖެ އަށް ހިލޭ ޑްރޯންތަކެއް ދިނުމަށް މަޝްވަރާ ކުރެވުނު ކަމަށެވެ.

ނިމިދިޔަ ފަސް އަހަރު އިބްރާހިމް މުހައްމަދު ޞާލިހްގެ ވެރިކަމުގައި މިފަދަ ކަމެއް ކޮށްފައިނުވާކަން ފާހަގަކޮށްލެވެއެވެ.